Piujuartitsinissamut suliniaqatigiiffik: RAL-imi paasiuminaatsuliortunik siulersuisoqarsinnaanngilaq

Issittumi uuliap kinertup tassa HFO-p inerteqqutigineqalernerani ilaatitsinngitsoqarnissaanik Royal Arctic Linep nalunaarutaa Piujuartitsinissamut suliniaqatigiiffiup arlaannaanulluunniit atassuteqanngitsup paasisinnaanngilaa.

- Royal Arctic Linep Kalaallit Nunaanni Issittumilu 2040-p tungaanut HFO-mik angalassuteqarnissaminut kimigiisissuteqarnera akunnakusooruteqangaatsiarsoraara.

- Taamaattoqarsinnaanngilluinnarpoq, Piujuartitsinissamut suliniaqatigiiffiup arlaannaanulluunniit atassuteqanngitsumi siunnersuisuuneq Clean Arctic Alliancemilu pilersitseqataasoq, Kaare Press-Kristensen oqarpoq.

AAMMA ATUARUK RAL-ip Issittumi uuliap kinertup inerteqqutigineqalernissaa aarlerigigaa

Taassuma umiarsuaatileqatigiiffiup siulersuisui Naalakkersuisunit taarserneqartariaqarsorai.

- Suliffeqarfimmi nutaaliaasumi, siulersuisut nutaaliaasut taama paasiuminaatsuliortigisinnaanngillat, siunnersuisuuneq oqarpoq.

Royal Arctic Linelli pisortaata, Verner Hammekenip HFO siunissami atugassaanngitsoq nalunagu erseqqissaatigaa.

- HFO-p piffissap ingerlanerani maani atorneqassanngitsoq ilisimavarput, Verner Hammeken oqarpoq.

Naalagaaffiit Peqatigiit imarsiartunut suliniaqatigiiffiata, IMO-p ataani ataatsimiititaliap Issittumi uuliap kinertup inerteqqutigineqalernissaanut siunnersuut sapaatip-akunnerani matumani oqaluuseraa. Siunnersuut taanna Danmarkip siunnersuuteqaqataaffigaa. Tamatumunngalu atatillugu pisortaq oqaaseqarpoq.

Peqataarusuppugut maannakkuunngitsorli

Inerteqquteqarnissamut piffissaliinissaq isumaqatigiinngissutaavoq. Royal Arctic Linep Umiarsuaatileqatigiiffiup inerteqquteqalerneq umiarsuarnut, uuliamik kinertumik ikummatissaqartunut aningaasaliinerit akilereerneranni tassa 2040-mi aatsaat atuutilersikkusunneruaa.

Tamannali Kaare Press-Kristensenip akuerinngilaa. Taassuma Royal Arctic Linep isumaani marlunnik tunngavisunik ajoquteqarsoraa.

- Siullertut, naalagaaffimmit pigineqarfimmit kissaatigineqartumut toqqaannartumik akerliuneruvoq, aamma Kalaallit Nunaanni Namminersorlutik Oqartussat Issittumi HFO-p inerteqqutigineqalernissaanut tapersiinertik nalunaarutiginikuuaat, Kaare Press-Kristensen oqarpoq.

- Ajornartorsiutaasup aappaa tassaavoq tamatuma saniatigut aningaasartuutigisassat eqqortut pillugit erseqqissumik paasissutissiisannginnerput, siunnersuisuuneq oqarpoq.

AAMMA ATUARUK Der skal laves en klar lovgivning om HFO

Ikummatissamit akikitsumit, HFO-mit akisunerusumik avatangiisinullu mingutsitsinnginnerusumik atugaqalernissaq umiarsuaatileqatigiiffimmut ukiumut 40-t aamma 60 millionit koruunit akornanni akeqassasoq Verner Hammekenip nalilerpaa. Tamanna ilaatigut pissutigalugu inerteqquteqarneq ukiualunnik utaqqisinneqartariaqarsoraa, taamaalilluni pissutsinut ataqatigiissitsisoqaqqaarsinnaassalluni.

- Taava aningaasarsiorneq avatangiisinillu mianerinninneq inississapput. Aamma inuiaqatigiinnik kalaallinik qajassuussineq taavalu aningaasat ullumi nalingi atorlugit 40-niit 60 millionit koruuninik ukiuni 15-ini ukiut tamaasa anngaasalliisarnissaq naliliinermi ilaapput. Taamaaliornissarlu pisariaqartoq isumaqarpugut, umiarsuaatileqatigiiffiup pisortaa oqarpoq.

Ikummatissaq minguinnerusoq aningaasanik tamanik naleqartoq

Kaare Press-Kristensenilli kingunerluutissanik misissueqqissaarnermit kisitsisit danskit naalakkersuisuinit suliarineqartoq taama ernumanartiginnginnerarpai. Taassuma misissueqqissaarneq naapertorlugu tamanna nunatsinni inuiaqatigiinnut ullormut agguaqatigiissillugu 25 øre-mik akeqassanerparpaa.

- Aningaasartuutit illoqarfinni innuttaasunut pigissaarnerusunut pingaartumik sunniuteqassapput. Sineriammi innuttaasumut ataatsimut aningaasartuutit 2 øremit 5 øremut akeqassangatinneqarpoq, Kaare Press-Kristensen oqarpoq.

AAMMA ATUARUK RAL sejler på HFO herhjemme - men ikke andre steder

Tamannalu avatangiisit eqqarsaatigalugit iluanaarnermik naleqarsoraa.

- Ilaqutariit aningaasaqarniarnerannik sequmiissasorinngilarput, akerlianilli kinertumik uuliakoornerup nunaqarfimmi inuuniarneq sequmilluinnarsinnaallugu. Taamaammanuna Issittumi kinertumik uulialersortarnissaq inerteqqutaasariaqartoq, siunnersuisuuneq oqarpoq.