Illuatungiliuttut: HFO erseqqissumik inatsisiliuunneqartariaqarpoq
Uulia kinertoq HFO-mik taaneqartartoq nunatta imartaani umiarsuit orsussatut atortarpaat. Orsussalli taassuma pinngortitamut mingutsitsinerujussua peqqutigalugu nunani allani amerlasuuni inerteqqutaavoq.
Naalakkersuisuniilli HFO suli erseqqissumik isummerfigineqanngilaq, illuatungiliuttullu annersaata Inuit Ataqatigiit naalakkersuisut erseqqissumik isummerfigeqqullugit kaammattorpaat.
AAMMA ATUARUK Der er foretaget tilstrækkelige undersøgelser af HFO
Illuatungiuliuttunniittut aamma, Demokraatit, uuliamik kinertumik orsussaqarneq pillugu erseqqissumik aamma inatsilioqqusipput.
- Mattutivinngilarput, kisianni aamma nunarput mianerisariaqarparput. Kisianni taamaakkaluartoq aningaasarsiortariaqaratta killilimmik mianersuullugu nunarput isummertariaqartugut aamma inatsisiliortariaqartugut ersarissumik paatsoorneqarsinnaanngitsumik, Nivi Olsen oqarpoq.
AAMMA ATUARUK Naalakkersuisut HFO inerteqqutaalissanersoq ersarissumik akissuteqarfigisariaqarpaat
Uulia kinertoq nunatta imartaani inerteqqutaaleraluarpat kingunerisinnaasai iluamik misissorneqarnikuunngimmata Naalakkersuisut suli isummersinnaannginnerarput.
Kisianni HFO atorunnaarsinneqartariaqartoq, Suleqatigiissitsisut oqarput.
- Avatangiisit eqqarsaatigalugit iliuuseqartartuuneq akeqarpoq. Tassalu aningaasartuut ataaseq. Kisianni pissutsit taamaapput. Kisianni akisunerulaarnissaa eqqarsaatiginagu maligassiuisuunissaq pingaartuutipparput, Suleqatigiissitsisut siulittaasuat Michael Rosing oqarpoq.
AAMMA ATUARUK RAL sejler på HFO herhjemme - men ikke andre steder
Nunatta minguissusaata nittarsaassutigalugu tanngassimaarutigiutigalugu HFO pillugu erseqqissumik isummerusunnginneq oqaluinnarnerunerarlugu Demokraatit isornartorsiuipput.
- Uani maluginiarparput pissutsini piviusuni akisinnaaneq ajortut. Assorujuk iluaappoq, uaguulluni isummerfigineqarsinnaanngitsut. Allornernik ikattunik siuttuuffigisassaraluit siuttuuffigineqarsinnaanngitsut akineqarsinnaanatillu, Nivi Olsen oqarpoq.
