Ilisimatooq: HFO-mut ilisimasat naammapput

Qulequtaaraq nalunaaqutaq 12.15 erseqqinnerusumik allaqqitaavoq.

Ilisimatooq DCE-meersoq, tassa Nationalt center for miljø og energi, Aarhus Universitetianeersoq taama oqarpoq.

- Pineqartoq naammattumik ilisimasaqarfigineqalereemat inassuteqaatitta nalornissutiginissaat pisariaqanngitsoq isumaqarpunga, Nationalt center for miljø og energimi ilisimatusartut pisortaat Kim Gustavson oqarpoq.

AAMMA ATUARUK Naalakkersuisut HFO inerteqqutaalissanersoq ersarissumik akissuteqarfigisariaqarpaat

Naalakkersuisut siulittaasuata Kim Kielsenip Sara Olsvigip pragraf 37 atorlugu apeqquteqaataanut ima akissuteqarpoq: "Naalakkersuisut suli Imartatsinni HFO-mik atuinermut inerteqquteqarnissaq pillugu isumminngillat". Issittumi HFO-mik atuinermut assartuussinermullu inerteqquteqarnerup kingunerisinnaasai suli naammaginartumik paasisaqarfigineqannginneri Kim Kielsenip akissutiminut tunngavilersuutigaa.

HFO-p issittup imartaani qanoq pissuseqartarneranut misissueqataasup uulia kinertumut ilisimasat naammattut Naalakkersuisunit pigineqarnerpai. Nationalt center for miljø og energimi DCE-p tamanna misissuiffiginerarnikuunerarpaa.

- Issittup imartaani HFO qanoq ittarnera pillugu misissuingaatsiarnikuuvugut. Uuliaavoq kinertorujussuaq uuliap akuiagaanngitsup sinnikua. Taannalu dieselimik akullugu imerpalasarneqartarluni, ilaasa uuliap annertussusaanit procentinik qulinik tyvenilluunniit akusarpaat.

AAMMA ATUARUK RAL-ip nunatta qanittuatalu imartaani HFO ikummatigaa – allanili naamik

Ajutoortoqaraluarpallu imartatsinnut kingunerluuteqartorujussuussaaq.

- Imarmut kuuttoorutigigaluaraanni avatangiisinut sivisuumik sunniuteqartussaavoq. Uulia taamaattoq arrortikkuminaatsorujussuuvoq, timmianullu uumasunullu imarmiuinut sunniinerluttorujussuusinnaalluni.

Taamaammat DCE-mit nunatsinni oqartussanut dieselip orsussatut atorneqarnissaa inassutigineqarpoq.

- Dieselimik orsussatortut avatangiisinut mingutsitsinnginnerupput. Dieselilu imarmut kuuttoorutigigaluaraanni imarmut siammassaaq arroriartorlunilu, Kim Gustavson oqarpoq, nunanilu allani HFO misissuiffigineqartareersoq naqissuserlugu. Misissuinerillu avatangiisinut sunniinerluttarnera aamma takutikkaa.

AAMMA ATUARUK Umiarsuit takornariartaatit Nuummi ikuallaaviup ukiumi ataatsimi ikuallaaneratut mingutsitsitigisartut

AAMMA ATUARUK Biilitit ima mingutsitsitigaat