Sara Olsvig Naalakkersuisut HFO inerteqqutaalissanersoq ersarissumik akissuteqarfigisariaqarpaat
Naalagaaffiit Peqatigiit imarsiortunut suleqatigiiffianni IMO-mi HFO inertuqqutaalissanersoq pillugu maanna oqallipput. Nunattalu oqallinnermini tusarsaanera naammanngitsoq Inuit Ataqatigiit siulittaasuat isumaqarpoq.
- Oliemik kinertumik nunatsinni atuineq annikillisartariaqarparput, uagut nammineq aalisariutitsinni atorneqarnera annikillisartariaqarparput, takornarissanik angallassinermi atorneqarnera annikillisartariaqarparput. Mingutsitsineq peqqissutsitsinnut avatangiisitsinnullu tuttussaammat, Sara Olsvig oqarpoq.
Danmark IMO-mut ilaasortatut inerteqquteqarnissaq pillugu suli isumminngilaq, nunarpullu pisortatigoortumik isummerfiginngippagu, taanna IMO-mut isumaqatiginninniarnernut ilaatinneqarsinnaanngikkaat, Sara Olsvig isumaqarpoq.
- Tassanilu amingaatigisimavarput naalakkersuisut qanorpiaq isumaqarnersut paasissallugit aammalu isumaqatiginninniarnerni taakkunani qulakkeersimaneraat nunatsinniit nipi ersarissoq apuunneqartarnissaa.
AAMMA ATUARUK Umiarsuit takornariartaatit Nuummi ikuallaaviup ukiumi ataatsimi ikuallaaneratut mingutsitsitigisartut
Taamaammat inertuqquteqarnissamut qanoq pisortatigoortumik isumaqartoqarnersoq pinngortitamut avatangiisinullu naalakkersuisumut apeqquteqaateqarpoq.
- Isumaqarpunga uani akissummi marloqiusaalaartumik akineqartugut. Siullermik erseqqivissumik akineqanngilagut naalakkersuisut qanorpiaq olie kinertoq pillugu isumaqarnersut. Qanorpiarlu aamma nunani tamalaani isumaqatiginninniarnerli Kalaallit Nunaat sinnerlugu oqariartuuteqarniarnersut, Sara Olsvigilli akissutigineqartut ilaat isumalluarfigaa.
- Aappaattullu naanerani takusinnaavarput naalakkersuisut oliep kinertup atorneqarnerata annikillisarnissaa piviusorsiortutut isigigaat.
Akissutillu taassuma IMO-mi oqallinnermi nunallu tamalaanut tunngasunut allani atorneqarsinnaanissaa Sara Olsvigip neriuutigaa.
- Taamaammat isumaqarpunga tamanna imannak tigusariaqaripput naalakkersuisut aamma annikillisaarusuttut. Tamannalu ilumoorsimappat taava erseqqissumik nunanut tamalaanut oqaatigiartorneqartariaqartoq, Inuit Ataqatigiit siulittaasuat, Sara Olsvig oqarpoq.
Umiarsuit takornariartaatit mingutsitsinerat, RAL-illu HFO-mik atuinera pillugit KNR piffissami kingullermi oqaluttuaqarpoq. Taakku KNR.gl-imi atuarneqarsinnaapput.
AAMMA ATUARUK RAL sejler på HFO herhjemme - men ikke andre steder
