RAL-ip Issittumi uuliap kinertup inerteqqutigineqalernissaa aarlerigigaa

Naalagaaffit Peqatigiit imarsiortunut suliniaqatigiiffiata, IMO-p ataani ataatsimiititaliap uuliap kinertup (HFO-p) Issittumi inerteqqutaalernissaanut siunnersuut ullumikkut oqallisigissavaa. RAL-ip pisortaata nunatsinnut malittarisassat sukangannginnerunissai neriuutigaa.
Verner Hammekenip oqarnera naapertorlugu HFO-p inerteqqutigineqalerneratigut ikummatissamik akisunermik atuinerneq umiarsuaatileqatigiiffimmut ukiumut 40-60 millionit missaannik aningaasartuutaassaaq. Namminersorlutik Oqartussat aningaasatigut kingunerluutissaanik misissueqqissaarnerata suliffeqarfiit, innuttaasut Namminersorlutik Oqartussallu aningaasartuutissaat 36,3 millionit koruunit missaanniipput. Assi © : Jacob Strøm/RAL
Allattoq Merete Lindstrøm
februaarip 20-at 2020 16:50

Naalakkersuisut Issittumi imaatigut angallannermi assartuinermilu HFO-p inerteqqutigineqalernissaanut 2018-imi tapersiilerput. Danmark siorna decembarimi aamma tapersersuilerpoq.

AAMMA ATUARUK Uuliap oqimaatsup issittumi atorneqarnissaata inerteqqutaalernissaa Danmarkip taperserpaa

RAL-imili pisortap inerteqquteqarnissap immikkuualuttortaasa maanna inissinneqarpata aningaasanut kingunissai ernumatigai. Uuliami mingutsitsinerusoq, HFO atorunnaarlugu akisunerusunik mingutsitsinnginnerusunillu atuilernissaq akikitsuinnaanavianngilaq.

Issittup avataanut uulia kinertoq atorusukkaat

Siunnersuummi imaatigut angallannermi ikummatissamik angalanermut atorneqartussamik aamma ikummatissamik angallannermut atorneqartussamik assartuinermut inerteqquteqarnissaq pineqarpoq.

Tamannali RAL-ip ajoqutigaa. RAL-immi umiarsuaatileqatigiiffiit allat Europap Islandillu akornanni angalasartut assigalugit uulia kinertoq tankiminiitsikkusuppaa, taamaalillutik ikummatissamut akikinnerusumut atuinertik nuutsittarsinnaassagamikku.Issittup avataani uulia kinertoq atorusukkaat

- Islandimut aqqusaaraanni, umiarsuit HFO-mik uagut atukkatsinnit akikinnerungaatsiartumik atuisut ingerlaaqatigisarpagut, tamanna equngasoqarsoraara.

Taamaammat Danmarkip isumaqatigiinniarnermi ilaasup nunatsinnit umiarsuit Issittup avataanut angalanerminni HFO-mik atueqqusaannginnermut ilaatinneqannginnissaat sulissutigissagaa umiarsuaatileqatigiiffiup neriuutigaa.

AAMMA ATUARUK Uuliamik kinertumik nunarsuaq tamakkerlugu inerteqquteqarnissaq RAL-ip isumaqatigaa

Pinngortitamut, Avatangiisinullu Naalakkersuisoqarfiup pisortaata, Mette Skarregaard Pedersenip nunatta umiarsuaatileqatigiiffiinut pitsaanerpaamik piumasaqaatinik periarfissaqartitsinissaq sulissutigineqartoq uppernarsarpaa.

- Nunatsinnit inerteqquteqarnissaq avatangiisinullu pitsaanerpaamik angusaqarnissaq suli tapersersorneqarpoq, kisianni aamma inerteqquteqarnermut atatillugu nunatsinnut pilersuinermi aningaasartuutikinnerunissaq sulissutigineqarpoq.

Nunatta piumasaqataa qanorpiaq isumaqassanersoq naalakkersuisoqarfiup pisortaata itinerusumik oqaaseqarfigerusunngilaa.

RAL-ip ilaatitsisoqannginnissaa kinguartitsisoqarnissaalu neriuutigigaa 

HFO-mik angallassinissamut inerteqquteqarnissamut ilaatitsinnginnissap saniatigut Verner Hammekenip inerteqquteqarnerup nunatsinnut qaqugu atuutilernissaa aamma kissaatigaa.

- Tamanna aatsaat aningaasaliissutitta nutaat tamarmik akilereerneratigut tassa 2040-mi aatsaat pinissaa kissaatigaarput.

AAMMA ATUARUK RAL sejler på HFO herhjemme - men ikke andre steder

Danmarkimi isumaqatigiinniarnermut sinniisut akisussaaffitsik ilisimaarilluassagaat neriuutigalugu pisortap erseqqissaatigaa.

- Danmarkimiilluni HFO-mik Issittumi inerteqquteqalernissaq ajornanngitsuararsuuvoq. Nunarput isumaqatigiinniarnerni taamaattuni ilaasoqarluannginnera eqqarsarnartoqartippara, tamannami aningaasaqarnitsinnut tunngavoq.

IMO-mi ataatsimiinneq ulluni makkunani ingeralnneqartoq

Ataatsimiititaliap teknikkimut tunngasortai oqallisigissavai. Tamanna inerteqquteqarnissaq qaqugu atuutilernissaanut ilaatitsinnginnissamullu ilaatigut tunngavoq.

Marsip naanissaanut politikkikkut pilersaarummik saqqummersitsisoqassaaq tamannalu oktobarimi akuerineqassalluni.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk