Pisut ingerlaarnerat: Birnamut tunngasut
Arnaq 20-nik ukiulik Birna Brjánsdóttir periarfeerunneqartoq, islandimiut politiivisa nutaarsiassaqartitsivinnut arfininngornermi januaarip ulluisa 14-ianni nalunaarutigaat. Arnaq periarfeerunneqartoq aqqusinermi pisuinnarfimmi Laugavegurimi Reykjavikimiittumi ullaassakkut nalunaaqutaq 05:00-ip missaani kingullermik takuneqarpoq.
Biili aappalaartoq
Aqqusinermi tassani piffissamilu tassani biili aappalaartoq Kio Riomik meqqilik Polar Seafoodip kilisaataataani Polar Nanumi inuttanit attartugaq nakkutilliinermi assiliivikkut aamma takuneqarpoq.
Polar Nanoq Islandimit arfininngornermi ualikkut tassani aallareersimammat islandimi politiit qulimiguulik atorlugu kilisaammut paasiniaajartorput, politiillu pingasunngornermi nalunaarutigaat kilisaammi inuttat pingasut killisiorneqartussanngorlutik sapaatit akunneri marluk tigummigallarneqartussanngortut.
Pingajualli killisiorneqareerluni iperagaavoq, marlulli toqutsisimatut pasineqarlutik sapaatit akunnerini marlunni eqqartuussisumit tigummigallagassanngortinneqarlutik.
AAMMA ATUARUK Polar Nanumi inuttat marluk politiinit tigusarineqarput
AAMMA ATUARUK Kilisaammi inuttat eqqartuussisumut sassartinneqartut
Biilimi aak
Biilip kilisaammi inuttanit attartukkap misissorneqarnerani arnap aava nassaarineqarpoq, angutillu tigummigallarneqartut pisuunnginnerarput.
Politiit kilisaammi misissuinerminni ikiaroornartumik hashimik 20 kilomik nassaarput tassungalu atatillugu inuttaq alla aamma tigusarineqarpoq arfininngornermilu iperagaalluni.
AAMMA ATUARUK Arnaq ujaarineqartoq biilini aappalaartuni ilaasimavoq
AAMMA ATUARUK Hashimik nassaartoqarmat tigusarineqartut sisamaalersut
AAMMA ATUARUK Kilisaammi inuttaq politiinit iperagaavoq
Timaa nassaarineqarpoq
Arnaq 20-nik ukiulik ullut arfineq-pingajussaat politiinit, sakkutuunit immikkut sungiusakkanit annaassiniaasartunillu minnerpaamik 500-nit ujarneqareerluni timaa sapaammi januaarip ulluisa 22-anni nalunaaqutaq 13:00 nassaarineqarpoq.
Islandimiut politiivisa qulimiguulik atorlugu arnap timaa sissami Selvogsvitimiittumi naaralaartitsiviup qanittuani nassaaraat.
Nutaarsiassaqartitsivik Vísir naapertorlugu namminneq kajumissutsiminnik ujaaseqataasut 775-iupput.
Islandimiut politiivisa tusagassiortunik katersortitsinerminni oqaatigaat arnaq toqutaasimasorigitsik.
AAMMA ATUARUK Sakkutuut immikkut sungiusakkat ujarleqataalilersut
AAMMA ATUARUK Birna Brjánsdóttir toqungasoq nassaarineqarpoq
Killiffik
Maanna killiffik tassaavoq, angutit kalaallit marluk arnap 20-nik ukiullip toquneranut atatillugu pasisaammata, hashimullu 20 kilomut nassaarineqartumut atatillugu politiit tigusarisaqaratik.
Birna Brjánsdóttirip timaata nassaarineqarnerata kingorna Qaqortumi, Nanortalimmi, Maniitsumi, Tasiilami Nuummilu inuppassuit misiginneqataanertik takutinniarlugu sapaammi unnukkut katersuupput naneruutinillu ikitsillutik.
AAMMA ATUARUK Polar Nanumi inuttaasut attortisimaqisut
AAMMA ATUARUK Islandimiunik misiginneqataasut
