Island Birna Brjánsdóttir toqungasoq nassaarineqarpoq

Arnap toqungasup timaa Islandimiut politiivinit nassaarineqarsimavoq, nassaarineqartorlu tassaavoq ujaarineqartoq 20-nik ukiulik Birna Brjánsdóttir, januaarip ulluisa 14-ianni arfininngornermi ullaakkut periarfeerunneqartoq. Reykjavikimi politiit tusagassiortunik katersortitsinermi taama nalunaaruteqaqqammerput.
Assi © : Flickr/Reykjavik Metropolitan Police
Allattoq Mads Lynge, Anton Gundersen Lihn
januaarip 22-at 2017 14:24

Arnap toqutaasimanissaa ilimanartoq politiit oqaatigaat, misissueqqissaarnikkulli tamanna paasinarsiumaarnissaa neriuutigaat.

Arnaq Islandip illoqarfiisa pingaarnersaannit Reykjavikimit kujammut sineriaani Selvogsvitip naaralaartitsiviata eqqaani nassaarineqarpoq.

Arnap inuusuttup biilini aappalaartuni, Kia Riomik meqqilerneqarsimasuni, toqutaasimanissaa politiit ilimagaat.
Arnap Islandimiup 20-nik ukiullip arfininngornermi januaarip ulluisa 14-iannili periarfeerunneqartup aava biilini nassaarineqarsimavoq, aammillu misissuisoqarnissaa pillugu nunamut allamut kingorna nassiussisoqarluni.

Kalaallit angutit marluk Polar Nanumi inuttaasut, suliamullu atatillugu Islandimi politiinit tigummigallagaasut, biilinik ingerlatsisuusimasut Iceland Monitorip allaaseraa.

Angutit taakku marluk toqutsisimasutut pasineqarput. Angutilli taakku pinngitsuunerarput.

Nuummi innuttaasut ilaat Islandip sinniisuutitaqarfiata silataani unnugu nalunaaqutaq arfineq-marlunut katersuunniartut Sermitsiaq.AG-p allaaseraa, Birna Brjánsdóttir eqqaaniarlugu naneruummik ikitsiniarnertik pillugu Islandip sinniisuutitaqarfiata silataani katersuunniarlutik.

Qaqortumi Tasiilamilu assingusumik aaqqissuussisoqarniartoq aviisip aamma allaaseraa.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk