Island Arnaq ujaarineqartoq biilini aappalaartuni ilaasimavoq

Arnap Islandimiup 20-nik ukiullip arfininngornermi januaarip ulluisa 14-iannili periarfeerunneqartup aava biilini Kia Riomik meqqilersukkani, suliamullu attuumassuteqartuni, nassaarineqarsimavoq. Islandimi politiit Facebookikkut quppernerminni taama allaaserisaqarput.
Assi © : Amanda Graham/Flickr Creative Commons
Allattoq Mads Lynge
januaarip 22-at 2017 13:32

Islandimi politiit aammik biilini nassaarsimapput, aammillu misissuisoqarnissaa pillugu nunamut allamut kingorna nassiussisoqarluni.

Paasisallu nutaat tassaapput aak pineqartoq arnamit 20-nik ukiulimmmeersuusoq. Arnaq sapaatip-akunnerata kingulliup naaneraniilli periarfeerunneqarpoq.

Arnap periarfeerunneqartup biilini aappaluttuniissimanissaa taamaammat inerniliunneqarsinnaasoq, Islandimi politiit Facebookimi quppernerminni oqaatigaat.

Kalaallit angutit marluk Polar Nanumi inuttaasut, suliamullu atatillugu Islandimi politiinit tigummigallagaasut, biilinik ingerlatsisuusimasut Iceland Monitorip allaaseraa.

Angutit taakku marluk toqutsisimasutut pasineqarput. Angutilli taakku pinngitsuunerarput.

Islandimi politiit arnaq 20-nik ukiulik suli ujaarivaat. Annaassiniartartut 500-nit amerlanerusut ippassaq arfininngornermi ujarleqataapput. Iceland Monitor taama allaaserisaqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq