Pinngortitaleriffik: Nannut avannaaniittut uumaffigissaarallarput

Avanersuarmi nannut – Kangerliumanersuarmi Kane Bassin-imik taaneqartartumi uumasut – amerliartorput, issittup sinnerani nannut ajornartorsiortitaasut assiginagit.

Pinngortitaleriffik tusagassiuutinut nalunaarummi allappoq.

AAMMA ATUARUK Pinngortitaleriffik nannut Qeqertarsuatsiaaniittut pillugit: Nerisassarsiuinnassapput

Qaanaap avataani Kane bassinimi nannut uumaffigissaarallarput. Tamanna sikup aajuitsup ilarujussua ukiut ingerlaneranni aakkiartortarneranik pissuteqarpoq.

- Sikuertalernerata kingunerisaanik seqerngup qinngorneri immamut annguttalersimapput, uumassuseqartitsinerulerlutillu, Pinngortitaleriffik allappoq.

Tamanna Kane Bassinimi nannut malugisinnaavaat. Pinngortitaleriffimmit ilisimatuut Canadami, Norgemi USA-milu suleqatitik peqatigalugit misissuipput.

Siusinnerusukkut 1993-imit 1997-imut misissuinermi nannut 225-iupput.

Piffissami nutaanerusumit 2012-imit 2016-imut misissuinermi nannut 360-it missaanniilersimapput.

- Amerleriarnerisa saniatigut nannut sumiiffimmi annertunerujussuarmi uumaffissaqalersimanerat misissuinerup takutippaa, Pinngortitaleriffik allappoq.

Uumaffigissaarallaannartut

Nannulli Kane Bassinimi uumaffigissaarnerat piffissami sivikitsuinnaaratarsinnaasoq, ilisimatuut erseqqissaatigaat.

- Imarli Qaanaap avataaniittoq kissarneruleqqissappat nannut tamaaniittut kujasinnerusumeersutulli atugaqalersinnaallutillu ajornartorsiulersinnaapput, Pinngortitaleriffimmi qaffasinnerusumik ilisimatusartoq, Kristin Laidre oqarpoq.

Nannut nunatta kujasinnerusortaani immap piffissami sivisunerusumi sikoqanngiffigisartagaaniittut nunamiinnerusartut ilisimatuut erseqqissaatigaat. Nannut immap sikuaniinnerminni puisinniarsinnaapput, nunamiikkaangamilli nerisassanik nassaarniarnerat ajornarnerusarluni.

AAMMA ATUARUK Ilisimatooq ukiakkut ataatsimiinnissaq pillugu: Aningaasanut inatsit, nannut Nuugaatsiarlu isiginiassavatit

- Silap pissusiata allanngoriartuinnarnera unitsinniarlugu iliuuseqartoqanngippat, taava Kangerliumanersuarmi Kane Bassinimi nanoqatigiiaat kujasinnerusumi nanoqatigisamittulli atugaqalertussaassapput, Pinngortitaleriffimmit, Kristin Laidre oqarpoq.

Nannut Kane Bassinimiittut Issittumi nannut 1-2 procentiinnaraat. Nanoqatigiit taakku nunarsuarmi nannut avannarpasinnerpaamiittut ilagaat.