Pinngortitaleriffik nannut Qeqertarsuatsiaaniittut pillugit: Nerisassarsiuinnassapput

- Nannut allamik sumukarfissaqannginnamik ukiornissaanut utaqqinerminni nunakkut ingerlaarlutik nerisassarsiortarput.

Pinngortitaleriffimmi imaani uumasut pillugit immikkoortortaqarfimmi aqutsisoq, Fernando Ugarte oqarpoq.

Nannut pingajoqqat tassa arnaviaq piaqqallu marluk Nuup Paamiullu akornanni nunaqarfimmi Qeqertarsuatsiaani takuneqarput.

AAMMA ATUARUK Naalakkersuisoqarfiup Greenland Cruisesip nannunnik takornariarnissaa akuerigaa

Tamatuma kingorna aggertarlutillu ingerlaqqittarput, sisamanngormallu ualikkut qunutinneqarlutik maannamut qimagutsinneqarput.

Tunuminngaanneersinnaasut

Nannut pingajoqqat Qeqertarsuatsiaanukannginnerminni suminngaanniit ingerlarsimassaneri Pinngortitaleriffiup ilisimanngilaa. .

- Suminngaanneerneri ilisimaqqissaanngilara. Kisianni Paamiuni ukiut pingasut sisamat matuma siorna nannuttoqarpoq. Taanna tunuminngaarsutut nalunaaqutseqqasimavoq, aqutsisoq oqarpoq.

Nannut pingajoqqat maanna sumunnassanersut Fernando Ugartep naluaa, nannulli nerisassarsiornerukkajupput.

- Nuuk Kangerluani ukiualuit matuma siorna nanoqarpoq, taanna aasakkut aallaaneqarnissami tungaanut tassaniippoq.

AAMMA ATUARUK Nannut pingajoqqat Qeqertarsuatsiaanut utertut

- Taamaammat nannut nerisassarsiuinnassagunarput. Sumiiffigisinnaasaminnillu nassaassagunik tassaniiginnassallutik, Fernando Ugarte oqarpoq.

Tuttut saarngi mamartut

Nannut nassaarisinnaasaminnik suugaluartumilluunniit nerisassarsiorniarsarissapput. Aggustimili tuttunniartoqalerpoq, Fernando Ugartellu nannut tuttut sinnikuinut qujaannarnavianngitsut ilimagaa.

- Nannut puisinik nerisaqarnerusarput. Kisianni tuttumik toqungasumik nassaassagunik nuannaarutigissavaat, pinngortitaleriffimmi aqutsisoq oqarpoq.

Nannut issittumi uumasuupput, puisinillu pisaqarfigisinnaasaminni immap sikuaniinnerusarlutik.

Nunattali eqqaani immap sikua ukiuni kingullerni kinguariartorpoq. Sumiiffinni sikoqanngittarnera sivitsoriartorpoq, taamaammat nannut siusinnerusumit nunamukarnerusalerput. Nunamiinnerminni nerineqarsinnaasut tamaasa ujartortarpaat.

- Nunamukaraangamik nerisinnaasaminnik nerisaqartarput. Nannut sikoqannginneruleriartornerani salunneruleriartuinnarput – nanoq ullormut nalinginnaasumik 1 kiilumik oqilisinnaavoq.