Naalakkersuisoqarfiup Greenland Cruisesip nannunnik takornariarnissaa akuerigaa

-Naalakkersuisoqarfimmut inunnik nunaqarfimmut niusiartorsinnaanerlunga apeqqutigaara. Tamanna naalakkersuisoqarfimmit akuerineqarpoq.

Taama Greenland Cruisesimik piginnittoq Ivik Ostermann oqarpoq.

Taanna nannunnik pingasunik nunaqarfimmut Qeqertarsuatsiaanut takornariartitsinissaminut akuerisaavoq.

AAMMA ATUARUK Nuummi takornarialerisut nannunik takornariarnissamik neqerooruteqartut

-Nannut taakku toqqaannartumik malersornavianngikkipput imaluunniit angallammik qanillattornavianngikkipput naalakkersuisoqarfimmut erseqqissaatigaara, ilaasullu nunaqarfimmut nioriarlugit akunnerit marluk qaangiuppata Nuummut uteqqissasugut erseqqissaatigalugu. Tamanna naalakkersuisoqarfimmit ajorinngilaat, Ivik Ostermann oqarpoq. 

Naalakkersuisoqarfimmit angalaaqataanissamut qujaannartut

Greenland Cruisesiminngaanniit Ivik Ostermann Qeqertarsuatsiaap kujataata nuuanut aqagu nalunaaqutaq arfineq-pingasunut angalassamaarpoq.

Namminersorlutik Oqartussat naapertorlugu nannut ajoqusersorneqaqqusaannginnerinik tunngatillugu inatsimmi nannut qanillattorneqaqqusanngitsut assigisaanilluunniit ajoqusersorneqaqqusaanngitsut allaqqavoq.

AAMMA ATUARUK Namminersorlutik Oqartussat takornarialerisunut: Nannut kommunefogdeluunniit akornusersornagit

Taamaammat angalanissap aaqqissuunneqarsinnaanera qularineqangaatsiaraluarpoq.

Taamaammat Ivik Ostermannip tamanna qulakkeerniarlugu naalakkersuisoqarfiup nannunnik takornariartitsinissamik qaaqqusivoq.

- Qujaannarput, Ivik Ostermann oqarpoq. 

Nannut allamukarsimassappata angalanissaq unitsinneqassasoq

Ivik Ostermannilli nannunnik takornariartitsinissaminik akuersissummik tunineqarnini nuannaarutigaa.

-Soorunami nuannaajallappunga, inuillu aamma angalaqataarusullutik uannut allallutik saaffiginnillattaapput.

Angalanissaq akunnernik sisamanik sivisussuseqassaaq, Ivik Ostermannillu aallannginnerminni nannut suli taakaniinnersut paasiniarlugu Qeqertarsuatsiaanut sianeqqaassamaarpoq.

Taanna inunnik 25-nik amerlassuseqartunik angalanissamut peqataarusuttunik saaffigineqareerpoq.

Taassumali nannunnik takusoqarnissaanik qulakkeerinnissinnaanngilaq.

-Inuit nannunnik takussanersut qulakkeersinnaanngilarput. Nannut suli taakkaniinnerinik paasiniaalluta nunaqarfimmi innuttaasunut sianerluta paasiniaajumaarpugut. Allamukarsimassappatalu angalaqataasussanut angalanissap unitsiinnarneqarneranik kalerriiumaarluni, Ivik Ostermannip oqaatigaa.

AAMMA ATUARUK Nannut pingajoqqat Qeqertarsuatsiaanut utertut

Nanoqassappalli angalatitsiniarluni eqqarsarpoq.

-Tamanna aqagu iluatsissappat sapaatip akunnerata tulliani aamma misileeqqikkumaarpugut. Qanorli pisoqassanersoq piffissap takutikkumaaraa, Ivik Ostermann oqarpoq.

Nannut pingasut nunaqarfimmut pingasunngormat ullaap tungaa takkupput. Nunaqarfimmilu innuttaasut aallaammik seqqorlutik nannut pingasut qimaasinnissaat nalunaaqutap ataatsip missaani iluatsissimavaat – marlunngormalli takkuteqqissimapput. Innuttaasullu aallaasertik atorlugit ungasillisaqqippaat. Nannulli taakku pingasut nunaqarfimmut pingasunngornermi ullaap tungaa qanilleqqipput. Innuttaasullu nannut ungasillisaqqikkamikkit ualisoq iluatseqqippaat.