Namminersorlutik Oqartussat takornarialerisunut: Nannut kommunefogdeluunniit akornusersornagit
Greenland Crusises takornariaqarnermilluunniit suliaqartut allat nannunik takornariartitsiniartut uumasunut akornusersuissanngillat.
Aalisarnermut, piniarnermut nunalerinermullu naalakkersuisoqarfik tusagassiuutinut nalunaaruteqarluni paasissutissiivoq.
Inoqarfiit iluanni ”nannut ajornartorsiutaasut”
”Nannut ajornartorsiutaasut” imatut paasineqassapput qimaatinneqartaraluarlutik inoqarfinnut uteqattaartartut.
Toqutsinissamik akuerissuteqarneq
Nannunik ajornartorsiutaasunik toqutsineq taamaallaat APNN-imit akuerineqarnikkut pisinnaavoq. Nannunik toqutsineq periarfissat kingullersarissavaat, tamannalu pisariaqarnersoq APNN pisumiit pisumut naliliisassaaq.
Toqutsinissamik qinnuteqarneq APNN-imut saaffiginnissutigineqassaaq aammalu uppernarsaateqarnissaq immikkuualuttunullu paasissutissiinissaq pisariaqarluni.
Assersuutigalugu:
-
Ajoqusikkanik assilisat,
-
isiginnittut eqqartugaat, nassuiaatigisaat
-
Nannumik nannunilluunniit toqukkusutanik assit.
Politiit, kommunefogedi imaluunniit piniarnermik aalisarnermillu nakkutilliisoq aallaaviusumik toqutsisuussapput.
Tigusiffik: Naalakkersuisut
Nannut pingajoqqat nunaqarfimmut Qeqertarsuatsiaanut ataasinngormat ullaap-tungaali qaninnguulerput
Tamanna pissutigalugu inuit nannut tungaanut aallarlutik assiliilluarniariartorput - Greenland Cruisesillu Qeqertarsuatsiaanut takusassarsiorluni angalanissat aqagu sisamanngornermut aaqqissuuppaa.
Taamaammat naalakkersuisoqarfik maanna kaammattuuteqarpoq. Kaamamttuuteqarnermi pingajoqqat ungasinniarneqassasut takugaannilu qimanneqassasut kaammattuutigineqarpoq.
Tamatumalu kingorna pingajoqqat sumi takusimanerlugit annikitsortalersorlugu aalisarnermut, piniarnermut nunalerinermullu naalakkersuisoqarfik aalisarnermut piniarnermullu nakkutilliisoq aqqutigalugu nalunaaruteqarfigineqassalluni.
Naalakkersuisoqarfiup nannut pillugit inatsisit uku innersuussutigai:
Paragraf 3: Nannut eqqissisimatitaapput
Namminersorlutik Oqartussat nannunik piniarneq illersuinerlu pillugit nalunaarutaat naapertorlugu nannut eqqissisimatitaapput.
Qaanaamiilli Nanortallip aqutsiveqarfia ilanngullugu nannut juulip aallaqqaataaniit aggustip 31-at ilanngullugu eqqissisimatitaapput.
Ittoqqortoormiit aamma Tasiilap aqutsiveqarfiini juulip aallaqqaataaniit septembarip 30-at ilanngullugu nannut eqqissisimatitaapput.
Piaqqat arnaminnik pisariaqartitsisut arnavissallu ataatsimik arlalinnilluunniit piaqqisartut ukioq naallugu eqqissisimatitaapput.
Paragraf 4: Akornusersuinissaq inerteqqutaavoq
Nannunik qammaaneq, ujaasineq, malersuineq allatulluunniit akornusersuinissaq inerteqqutaapput.
Taamaakkaluartorli piniarnermut aallaaniarnermullu malittarisassat malillugit imaluunniit nannunik sumiiffimmit qimaatitsiniarsarinermi nannunik ujaasisoqarsinnaallunilu malersuisoqarsinnaavoq.
Politiit, piniarnermik nakkutilliisut, kommunefogedit, inuilluunniit allat pisinnaatinneqartut nannunik sumiiffimmiit qimaatitsiniarlutik ungoorineranni akornusersornissaat inerteqqutaavoq.
Dronit nannunik filmiliornermut allatulluunniit malersuinermut atornissaat aamma inerteqqutaavoq
Nannut ajornartorsiutaasut
Aalisarnermut, piniarnermut nunalerinermullu naalakkersuisoqarfik "nanoq ajornartorsiutaasutut" nalilerneqarpat immikkut akuersissuteqarsinnaavoq.
Nannup aallaaneqannginnerani immikkut akuersissuteqartoqassaaq. Piniarnermut nakkutilliisut, politiit imaluunnit aalisarnermut, piniarnermut nunalerinermullu naalakkersuisoqarfimmit allat kisimik nannumik toqutseqqusaapput.
Nannunut peqqusaarisoqassanngitsoq
Inaarutaasumillu naalakkersuisoqarfiup "nannunik ajornartorsiutaasunik" isumaginninnissamut malittarisassat ima allassimasut innersuussutigineqarput:
- Nannut inunnik, uumasuutinik, atortunik, illunik il.il. ulorianartorsiortitsisinnaapput. Saassunneqaataasinnaasumik iliuuseqartoqassanngilaq.
- Misigisassarsiorusunneq nannunilluunniit assileerusunneq ilinnik, allanik nannunilluunniit ajornartorsiortitsissanngilaq.
KNR-ip aalisarnermut, piniarnermut nunalerinermullu naalakkersuisoqarfik ippassarli oqaaseqartinniarsaraa. Tamanna suli iluatsinngilaq.