Nannut pingajoqqat Qeqertarsuatsiaanut utertut
Nannut pingajoqqat nunaqarfimmit Qeqertarsuatsiaaniit ippassaq qimaatinneqarput. Nunaqarfik taanna Nuup Paamiullu akornanniippoq.
Nannut pingajoqqat Qeqertarsuatsiaat akianni 300 meterinik ungasitsigisumi qeqertameerujoorsimapput. Nalunaaquttallu ataatsip missaani nunaqarfimmi piniartumit, Ole Henriksenimit seqqortaarfigineqarlutik qimaatineqarput - taakkuli ullaaq uterput.
AAMMA ATUARUK Nannut pingajoqqat Qeqertarsuatsiaat eqqaanniit qimaatinneqartut
- Qeqertarsuatsiaat akinnguaniipput 500 meterip iluannut pisimapput aapikkua massakkoqqissaaq najorpakka, Ole Henriksen KNR-imut oqarpoq.
- Ippassarli kaleriinikuugama alapernaassallugit, ullaarli arfineq marluk qeqqartoq paasivagut akitsinniilersimasut ikani Saqqarleertikkatsinni.
Pingajoqqat eqqissisimatitaapput
Nannut taakku kaassimannguatsiarput, aasarmi arferit Qeqertarsuartsiaani pisarineqarsimasut saanikui nererujoorpai.
Nannut pingajoqqaammata eqqissisimatinneqartussaapput. Inunnullu ulorianartorsiortitsissappata ersiortillugit qimaatinneqarsinnaapput.
Ole Henriksenip nannut alutorsaaatigalugit nunaqarfimmiit ippassaq qimaatippai - ullumikkullu uternerat aarlerinartutut nalilerpaa.
Video fra i går: Video: Kuuka Ottosen
- Toqqissisimananngitsorujussoorpasipput. Eqqaassisaqattaarnikuulluta taama annertutigisumik, uteqqissimanerat akuersaaruminaatsorujussuuvoq. Tuttunniarfiup nuniagiarfiullu nalaani taamatut nunaqarfitta eqqaani, taamaattoqarnera akuersaaruminaaqaaq.
Aalisarnermut, Piniarnermut Nunalerinermullu Naalakkersuisoqarfiup Qeqetarsuatsiaanni kommunefogedi pisut malinnaavigeqqullugit attaveqarfigaa, Ole Henriksenilu piniarnermut allagartaqarmat tamatuminnga iminneqarpoq.
