Ilisimatooq ukiakkut ataatsimiinnissaq pillugu: Aningaasanut inatsit, nannut Nuugaatsiarlu isiginiassavatit

Timit paniinnarnikut, nannut, Nuugaatsiaq, aningaasanut inatsit nunanullu allanut tunngasunut politikki. Ilisimatuup ukiakkut ataatsimiinnermi immikkoortut tallimat malinnaaffigissallugit pingaaruteqartutut oqaatigai.
- Ataatsimiinneq coronap nalaanit ersiuteqarpoq, tassa aningaasanut inatsit ilanngortugaassaaq, nutaanut nutartikkanullu suliniutinut amerlasuunut inissaqartitsisoqanngilaq, Rasmus Leander KNR-imut oqarpoq. Assi © : KNR / Malik Brøns
septembarip 25-at 2020 06:17
Nutserisoq Connie Fontain

Ukiakkut ataatsimiinneq ullumikkut aallartippoq.

Inatsisartunit immikkoortut nutaat 56-it Naalakkersuisuniillu immikkoortut nutaat 32-t oqallisigineqassapput.

Ukiakkut ataatsimiinneq 2020 

 

Inatsisartuni ukiakkut ataatsimiinneq septembarip ulluisa 25-anni nalunaaqutaq 11.00 aallartissaaq, novembarillu ulluisa 25-ata tungaanut ingerlassalluni.

 

Tamatuma kingorna Inatsisartut unikkallassapput, ukiukkullu ataatsimiinnermi 2021-mi februaarip ulluisa 16-iannit marsip ulluisa aappaanut ataatsimiinnermi ataatsiinnerat ingerlaqqissalluni.

 

Ukiakkut ataatsimiinnermi siunnersuuterpassuit oqallisigineqartussaapput.

 

Inatsisartunit immikkoortut nutaat 56-it Naalakkersuisuniillu immikkoortut nutaat 32-t oqallisigineqassapput.

Suut malinnaaffigissallugit pingaaruteqarpat? KNR-ip Ilisimatusarfimmit adjunkti, Rasmus Leander tamanna pillugu apeqquteqarfigaa.

2021-mut Aningaasanut inatsisissatut siunnersuut

Siullertut pissanganarnerpaatullu Naalakkersuisut aningaasanut inatsisissatut siunnersuutaat. Tassani 183 millionit koruuninik amigartoortoqarpoq.

- Ataatsimiinneq coronap nalaanit ersiuteqarpoq, tassa aningaasanut inatsit ilanngartugaassaaq, nutaanut nutartikkanullu suliniutinut amerlasuunut inissaqartitsisoqanngilaq, Rasmus Leander KNR-imut oqarpoq.

AAMMA ATUARUK Ukiakkut ataatsimiinneq isumaqatigiinngiffiulluni aallartissasoq: Naalakkersuisut marluk navianartorsiortut

Taassuma coronap ilungersunartorsiortitsinera nunatta aningaasaqarneranut siusinnerusumi ilimagisatulli sunniuteqartigissanngitsoq erseqqissaatigaa.

- Taamaakkaluartorli immikkoortortani tamani sipaarnissaq aningaasanut inatsisissami ukiakkullu ataatsimiinnermi inerniliissutaassaaq, Ilisimatusarfimmi adjunkti allappoq. 

2021-mut aningaasanut inatsisissatut siunnersuut siullermeertumik septembarip ulluisa 30-anni oqallisigineqassaaq. Tamatuma kingorna oktobarip ulluisa 28-anni aappassaaneerneqassaaq, novembarillu ulluisa 13-ianni pingajussaaneerneqassalluni.

Nunanut allanut tunngasunut politikkip oqallisigineqarnera pissanganartoq

Aappaattut pingaaruteqarlunilu pissanganartumik oqallinnissaq Rasmus Leanderip oqarnera naapertorlugu nunanut allanut tunngasunut politikki pillugu ukiumoortumik nalunaajaaneruvoq.

- Nunanut allanut tunngasunut politikki pillugu nalunaajaanerup nanginnerani oqallittoqarnissaa nunatta nunat tamalaat akornanni politikkikkut inissisimanerata malinnaaffiginissaa pingaartumik pissanganarpoq, Issittumummi nunatsinnullu soqutiginninneq piffissami kingullermi annertunerungaatsialerpoq, Rasmus Leander oqarpoq.

Taassuma Kinami sinniisumik pilersitsisoqassanersoq Inatsisartut aalajangiiffigissagaat aamma erseqqissaatigaa.

2020-mut nunanut allanut tunngasunut politikki pillugu nalunaajaat marlunngornermi, septembarip ulluisa 29-anni saqqummersinneqassaaq.

Illorsuit Nuugaatsiallu ammaqqinneqarnissaat

Rasmus Leanderip siunnersuutit immikkoortullu nunatsinni politikkikkut pingaaruteqarsinnaasut aamma erseqqissaatigai.

Karrat Kangerluani tassaarsuaqarneranit ukiut pingasut maanna qaangiupput.

AAMMA ATUARUK Naalakkersuisut: Illorsuarnut Nuugaatsiamullu uternissaq ulorianarpallaarpoq

GEUS-ip annertuumik misissuinera naammassippat Illorsuit Nuugaatsiallu ammaqqinneqarnissaat pillugu Naalakkersuisut misissuinissaat, Inuit Ataqatigiinnit, Aqqa Samuelsenip siunnersuutigaa.

Siumumit, Karl-Kristian Krusep aarlerisaarinermut atortunut pingaartumik Illorsuit eqqaani qaqqamit sisoortoqarneranik aarlerisaaarinermut periarfissat aamma misissortikkusuppai.

”Nannut ajornartorsiutaasut” pillugit siunnersuut: Akuersissuteqarfiunngitsumik aallaaneqarsinnaassasut

Taavalu ”nannut ajornartorsiutaasut”-nik taaneqartartut Tunumi innuttaasut ilisimalluagaannut tunngasoq.

Partii Naleqqamit, Jens Napaattuup nannut ajornartorsiutaasut illoqarfinnut isertut aallaaneqarsinnaanngornissaat taamaalillunilu najugaqarfinnut qanillattortut akuersissuteqarfiunngikkaluartumik toqunneqarsinnaalernissaat siunnersuutigaa.

Siunnersuut novembarip ulluisa 11-anni oqallisigineqassaaq.

Immikkoortoq allanartoq timinut panernikunut tunngasoq

Kiisalu timit panernikut pillugit siunnersuut allanartoq, Rasmus Leander naapertorlugu aamma soqutiginarpoq. Siumumit, Doris J. Jensenip kalaallit timaasa panernikut Harvard Universitymi Peabodyp Katersugaasivianit nunatsinnut utertinneqarnissaat kissaatigaa.

- Nunatsinni timinut panertunut atugassarititaasut ajunngilluinnaraluartut taamaattoq timinik panernikunik ikittuinnarnik nassaartoqarsimavoq, taamaattumik Uunnartumi-timit panernikut itsarsuarnitsap amiakkuatut pingaarutilittut tassaallugit pingaaruteqarput. Nunatta oqaluttuarisaaneranut ilaalluinnarput; qanga pingoqqaarnitsinniit kulturitoqqamiillu oqaluttuartuupput, Doris J. Jensenip siunnersuutaani allassimavoq.

Siunnersuut novembarip ulluisa pingajuanni oqallisigineqassaaq.