Naalakkersuisut: Illorsuarnut Nuugaatsiamullu uternissaq ulorianarpallaarpoq

Karrat kangerluanni qaqqat sisoorsinnaanerat suli ilimanaateqarpoq. 

Ulorianartorsiornerlu ajorarluartumik suli piinngitsoq, Naalakkersuisut allapput. Sisooriasaaraluarpallu innuttaasut kalerrinneqarnissaminnut angumersinngitsoorsinnaapput.

Taamaattumik Illorsuarni innuttaasut angerlarnissaannik aaqqissuussinissamut Naalakkersuisut pilersaaruteqanngillat. 

Arfininngornermi juunip ulluisa 17-anni 2017-mi oqaluttuarisaanermi ajunaarnersuarmik pisoqarpoq, tassaarsuartoqarnerani Illorsuarmi Nuugaatsiaamilu innutaasut illut angallatillu immamit nassataritimmata. 

Maannalu ukiut pingasut qaangiunneranni nunaqarfimmi innutaasut toqqissillutik nunaqarfimminnut uternissaat ilimanaateqanngilaq. 

Taama nalunaaruteqarpoq Sulliffeqarnermut Ilisimatusarnermut Avatangiisinullu Naalakkersuisoq Jess Svane Aleqa Hammondip paragraf 37 naapertorlugu apeqquteqaataanut akissuteqarluni. 

Misissuinerni takutinneqarpoq, Karrat Kangerluanni qaqqat sivingarngi  sisoriaannaasut, aammalu ulorianartorsiorfinnik arlalinnik takussaasoqartoq. 

Taama naliliipput Kalaallit Nunaanni Upalungaarsimanermut Ataatsimiititaliaq aamma Naalakkersuisut, taammallu tamanna tunngavigalugu innuttaasut Illorsuarmut utissanngitsut, Jess Svane taama nalunaaruteqarpoq. 

Taamaattumik Illorsuarni najugaqarsimasut pisortanilu suliffeqartut sulitinneqarnissaat ajornartinneqarpoq. 

Siunissami Karrat Kangerluanni najugaqartussanut tassaarsuartoqalissagaluarpat piffissaq eqqorlugu kalerrisaarisinnaasumik soqanngilaq. 

- Karrat Kangerluanni nutaamik sisoortoqassappat, tassaarsuup Illorsuarmut eqquinissaanut nalunaaquttap akunneri arlallit ingerlasussaanngillat, ajoraluartumillu taamaallaat minutsit 12-13-it ingerlasussaallutik. 

Tamanna ulorianaateqarpoq, aammalu piffissaq innuttaasunut kalerriinissap angumerinissaanut naammattutut naliliiffigineqarluni Jess Svane Aleqa Hammondimut taama allappoq.

Karrat Kangerluaniinnissaq inerteqqutigineqanngilaq, innersuussutigineqaranili, Naalakkersuisut taama nalunaarput. 

GEUS Karrat Kangerluanni qaqqanik misissuipput siunissamilu alapernaarsuutinik kalerrisaarutinillu ikkussuiffissanik innersuussissalluni. 

COVID 19 pissutigalugu suliat kinguaattoorput innersuussutigineqartullu 2022-ip naalernerani naammassineqarnissaat naatsorsuutigineqarluni.