Pinngortitaleriffik iliuuseqaqqusisoq: Appat ukiuni qulini eqqissitivinneqarlik
Pinngortitaleriffiup allakkiaa qulequtaqartoq ” Kalaallit Nunaanni appat pillugit killiffik, 2016” taama inerniliiffigineqarpoq. Allakkiaq appat aqunneqarnerat pillugu allaaserisaasoq Pinngortitamut, Avatangiisinut Nukissiuuteqarnermullu Naalakkersuisumut Mala Høy-Kúkomut Aalisarnermut, Piniarnermut Nunalerinermullu Naalakkersuisumuttaaq Nikolaj Jerimiassenimut nassiunneqarpoq.
Peqatigitillugu aamma Pinngortitaleriffimmiit ilimasaarutigineqarpoq appat pillugit siunnersuineq nutaaq ukiamut septemberimi, 2016, saqqummiunneqassasoq.
Allakkiami aamma atuarneqarsinnaavoq Pinngortitaleriffimmiit 2012-imiilli Nunatsinni appat ineqarfii ajornartorsiorfioqisut pillugit mianersoqqusisoqartarsimasoq.
Taamanikkut erseqqissaatigineqarsimavoq appat aqunneqarnerat pillugu malunnaatilimmik sukaterisoqanngippat sinerissami sumiiffinni assigiinngitsuni appat ineqarfii ikinnerpaamik sisamat appaarutivinnissaat aarleqqutigineqarsinnaasoq.
Aamma atuaruk Kujataani appaqarfik najorneeruttoq
Aamma atuaruk KNAPK-p Pinngortitaleriffik isumaqatiginngilaa
Sivikitsumik piniartitsisoqarsinnaanera periarfissaassanngilaq
Kitsissut Avallerni appaqarfiit ilaat Ilumut imaarutivissimanersut Pinngortitaleriffimmiit ilisimatuussutsikkut suli uppernarsarneqanngilaq.
Pinngortitaleriffimmi Miluumasunut Timmissanullu Immikkoortortaqarfimmi, Pisortaq Fernando Ugarte ilisimatitsivoq Kitsissut Avallerni appanik aasap ingerlanerani kisitsisoqarnissaa pilersaarutigineqartoq. Pinngortitaleriffimmeersuttaaq pilersaaruteqarput appat ineqarfiat alla, ajornartorsiorfiusoq aasamut kisitsiviginiarlugu: tassa Upernaviup eqqaaniittoq Kingittoq.
Appaqarfiit taakku marluk appaqassutsimikkut kingullermik 2010 aamma 2012-imi kisitsinerniit ikileriaqqissimassappata biologit ilimagaat tullianik siunnersuinissami appat sivikinnerpaamik ukiuni quliugallartuni eqqissitivinneqarallarnissaannik innersuussuteqarnissartik; taamaalilluni kingullermik siunnersuinermi taarsiunneqarsinnaasutut ukiuunerani sivikitsumik piniartitsisoqarsinnaaneranik periarfissiisimanerigaluaq atorunnaarsinneqassalluni.
Aamma atuaruk Appat ikiliartuinnavipput