KNAPK-p Pinngortitaleriffik isumaqatiginngilaa
- Sinerissatsinnut appat takkuttartut allannguuteqanngillat. Taamaallaat avasinnerusumi piniarneqalernikuupput, KNAPK-mi uummassusilerisoq Bjarne Lyberth KNR-imut oqarpoq.
Appaqassusermut ikiliartorneraaneq KNAPK-p paasisinnaanngilaa. Piniartummi KNAPK-mi ilaasortat takusakkatik aallaavigalugit appaqarluartoq oqaluttuarisarmassuk.
- Piniartut appanniartartut sinerissaminngaanniit oqaluttuarisartagaat kujataaniit avannamut oqaatigisartagaat assigiipput, Bjarne Lyberth oqarpoq.
Appat ikiliartupiloornerarlugit Pinngortitaleriffiup mianersoqqussutigaa. Piniartulli appaqarluarneragaanerat taakku uppernarsaatissaqartinngilaat.
- Appat ineqarfinnut allanut nuussimanerarlugit piniartut oqaatigisartagaat amerlasooriarlugu tusartareerparput. Taakkulu ineqarfiit eqqaasaat misissuiffigisaraluarpagut ajoraluartumilli uppernarsarsinnaasimanngilarput ilumut appat nuttarnersut, Pinngortitaleriffimmi ilisimatooq Aili Labansen oqarpoq.
Aamma atuaruk Appat ikiliartuinnavipput
Sumiiffinni 19-iusuni 13-it appaarukkiartortut Pinngortitaleriffiup mianersoqqussutigaa. Ilulissallu qanittuaniittup Innap aappaarutivissinnaanera aarlerinarnerarlugu.
Silap pissusiata allanngoriartornera aamma peqqutaaqataasoq Pinngortitaleriffiup nalilerpaa.
- Pinngortitaleriffiup siunnersuutini 2013-imiilli attatiinnarpaa. Tassa appat ukiuni qulini piniaqqusaajunnaarlugit eqqissisimatinneqassasut. Piniarneqarneralli ingerlaannassappat sivisunerpaamik qaammat ataaseq piniagaasarnissaat innersuussutigaarput, Aili Labansen oqarpoq.
Aalisartulli Piniartullu kattuffiata appaqarluarneraanini aaliangiusimavaa Pinngortitaleriuffiullu ineqafinnik misissuilluni suleriaatsini allanngortissagaa innersuussutigalugu.
- Pinngortitaleriffiup Kalaallit Nunaata illoqarfii taamaallaat misissuiffigisimavaat kisianni naluneqanngilaq appat ineqarfii allanngornikuusut, Bjarne Lyberth oqarpoq.