Appat ikiliartuinnavipput

Nunatsinni appaqassuseq ilimagisamit suli ajornerusumik inissisimasoq paasineqartoq Pinngortitaleriffiup nalunaarutigaa.
decembarip 22-at 2015 09:14

- Appat Nunatsinniittut allaneersullu maaniittartut Pinngortitaleriffiup kingullermik timmissat pillugit 2013-imi siunnersuineranit paasissutissiissutigineqartumit suli ikinnerusut paasineqarpoq. Tamanna appat pillugit ilisimatuussutsikkut misissuinerit kingulliit paasinarsisippaat.

- Nunatsinniinnaq appat ikiliartortorujussuunngillat aamma Nunatta kangiatungaaniittumi nunani appaqassuseq ikiliartorfiupiloorpoq, Pinngortitaleriffik nittartakkamini ilaatigut taama allaaserisaqarpoq, pingaartumik Islandimi Svalbardimilu appat pineqartut nalunaarutigineqarluni.

Tamaani appat siumorneqartartut Nunatta kitaata sioraani ukiuunerani pisarineqartartunit amerlanerpaajusarput, taamaattorli misissuinerit nutaat takutippaat appat, pingaartumik piaqqisartut eqqarsaatigalugit, Canadami ukiisartut ajunngitsumik ingerlasut, Pinngortitaleriffik allappoq.

Aamma atuaruk Appanniarneq miterniarnerlu ammaanneqarput

Atlantikup avannaani sumiiffinni assigiinngitsuni appanik nalunaaqutsersuinerit aamma takutippaat appat Nunatta kitaata sioraani ukiisartut Nunatsinni, Islandimi, Svalbardimi Canadamilu appat ineqarfiineersuusartut, appallu Nunatta kitaata imartaani ukiisartunit pisaasartut amerlanerpaartaat Islandimeersuullutillu Svalbardimeersuusut misissuinerit aamma takutippaat.

Aamma atuaruk Timmissat pillugit nalunaarutissaq tusarniaassutigineqartoq

Nunatsinni, Islandimi Svalbardimilu appat ineqarfiini appaarukkiartortoqarnera ilaatigut ukiuunerani Nunatta imartaani piniagaasarnerinik tunngaveqartinneqartoq, ilisimatusartartullu aamma isumaqarput silap pissusiata allanngoriartornera aamma pissutaaqataasinnaasoq.

Aamma atuaruk Appat sakiai honningimut siatat