Assilissami nakkutilliisumit Per Nukaaraq Hansenimit juunip 24- ani 2015 assilineqarsimasumi takuneqarsinnaavoq Kitsissuni Avallerni qeqertat annersaanni Tupersuartuuni innaq timmissat inigisartagaat timmiaqanngitsoq.Assi: Pinngortitaleriffik

Kujataani appaqarfik najorneeruttoq

Kitsissuni Avallerni qeqertat annersaanni Tupersuartuuni innaq appanit najorneqartaraluaqisoq najorneerussimavoq. Assilissami piniarnermut nakkutilliisumit Per Nukaaraq Hansenimit assilineqarsimasumi tamanna takuneqarsinnaavoq.

Pinngortitaleriffik Kujataani Kitsissuni Avallerni appat inaanni pissutsit pillugit assilisanik uppernarsaatinik tunineqaqqammerpoq.

Tupersuartuut najorneqarunnaavissimarpasittoq, pinngortitaleriffiup piniarnermut, avatanngiisinullu naalakkersuisoqarfinnut paasissutissiivigaa.

Appat tamaani 1992-imi 1.900-uupput, 2010-milu 619-it kisinneqarsimallutik.

Aamma atuaruk KNAPK-p Pinngortitaleriffik isumaqatiginngilaa

- Immikkulli Tupersuartuuni appaqarfiup 2015-imi qimanneqarluinnarsimagunarnera eqqarsaatigalugu takuneqarsinnaalerpoq Pinngortitaleriffiup tamanna sioqqullugu siunnersuisarnerinut naleqqiullugu pissutsit ajorsilluinnalersimasut, ilisimatuut Flemming Merkel, Aili Labansenilu allapput.

Aamma atuaruk Appat ikiliartuinnavipput

Mannissarniartoqartarnerali appat tammarnerannut peqqutaasinnaasoq, ilisimatuut isumaqarput.

- Appaqarfimmi tassanerpiaq pissutsit eqqarsaatigalugit uppernarsineqareerpoq inatsisinik unioqqutitsilluni mannissarniartoqartuartarsimanera, allapput.

Appaqarfik biologinit 1985-imi pisissorneqaqqaarpoq, kingornalu misissuinerini tamani inatsisinik unioqqutitsilluni mannissartarnerit piniarnermut nakkutilliisumit paasineqartarpoq.

Kitsissuni Avallerni appat ikiliartornerisa pinngortitaleriffiup isiginninnera malillugu pissutsit ilungersunarsiartornerannik uppernarsaaqataavoq, siunnersuinerallu 2013-imeersoq suli atuuttoq eqqaasitsissutigalugu.

Pinngortitaleriffiup unioqqutitsilluni mannissarniartarnerup unitsinneqarnissaata sulissutigineqarnissaa aamma innersuussutigaa, taamatummi akornusersuisarnerit Kitsissuni Avallerni appaqarfittut ittuni ikiliartorfioreersuni pitsutsinik ajornerulersitseqataalluinnarmata. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat