Pinerluuteqarsimasunut inissiisarfinni nakkutilliisunut immikkut ittumik tapeqartitsinerup naligiimmik akissarsiaqartoqarnissaa qulakkeeraa
Nunatsinni pinerluuteqarsimasunut inissiisarfinni nakkutilliisut kiisalu danskit parnaarussiviini nakkutilliisut akornanni akissarsiat kiisami naligiilerput.
Akissarsiat pillugit isumaqatigiissut ukiuni marlunni atuuttussaq naapertorlugu akissarsianik nalimmassaasoqartussanngorpoq. Parnaarussivinni nakkutilliisut kattuffiata siulittaasuata, Bo Yde Sørensenip oqaluttuaraa:
- Tamanna isumaqarpoq, akissarsiat pillugit isumaqatigiittoqaqqimmat naligiimmik akissarsiat inissinneqartut.
Naligiimmik akissarsiaqalernissamut atatillugu juunimili isumaqatigiittoqareersimagaluarpoq, tassa eqqartuussisut, politiit pineqaatissinneqarsimasunullu inissiisarfinni nakkutilliisut akissarsiaasa nalimmassarnissaannut atatillugu, Inatsiseqarnermut ministeri qulakkeerigaluarpoq.
Danmarkimili parnaarussiviini nakkutilliisut akissarsiaat decembarip aallartinnerani qaffaqqinneqarmata - nunatsinni Danmarkimilu nakkutilliisut akissarsiaat nikingassuteqaqqilerput.
Taamaattumik akissarsiat naligiikkunnaarneri aaqqiivigigallarniarlugit Parnaarussivinni nakkutilliisut kattuffiannit pingaartinneqarpoq, akissarsiallu pillugit isumaqatigiinniartoqavinnissaata tungaanut aaqqiisoqassasoq, Bo Yde Sørensen oqaluttuarpoq:
- Soorunami aalajangersimasumik isumaqatigiissuteqarnissarput neriuutigigaluarparput, kisianni maanna ukiuni tulliuttuni marlunni atuuttussamik ataatsimik isumaqatigiissuteqarpugut. Tamannalu isumaqarpoq, pinerluuteqarsimasunut inissiisarfinni nakkutilliisut Danmarkimilu parnaarussiviini nakkutilliisut akissarsiaat naligiilertut, taanna oqarpoq.
Ukiuni qulikkaani isumaqatigiinngissutaasoq
Kalaallit pinerluuteqarsimasunut inissiisarfiini nakkutilliisut danskillu parnaarussiviini nakkutilliisut naligiimmik akissarsiaqalernissaat ukiuni qulikkaani ilungersuutigineqarpoq.
Naligiinnginnermilu isumaqatigiinngissutaasoq erseqqippoq, tamannalu aamma pissutigalugu suliffimmi navianartumi sulerusussinnaasunik sulisussarsiornermut aamma ajornakusoortitsisoq, Bo Yde Sørensen oqarpoq:
- Kalaallit suleqatigut ukiut 30-t sinnerlugit akilernerlunneqartarput. Maanna aaqqiissutissarsiortoqarpoq. Isiginngitsuusaaginnarsinnaajunnaarparpummi. Akiliinerluttoqarnerami pissutigalugu Kalaallit Nunaanni pinerluuteqarsimasunut inissiisarfinni nakkutilliisutut sulerusuttoqanngilaq.
- Parnaarussivinnilu nakkutilliisut Danmarkimit aallartissinnaasagut sinneqanngillat. Taakkulu marluk suliamik matumanik aaqqiissuteqarnissamut tunngaviunerpaasutut isigaakka.
Tamatuma saniatigut nakkutilliisut akissarsiaasa assigiinngissuteqartarnerat silaannarmik iluaatsumik pilersitsisarsimasoq, Bo Yde Sørensen oqaluttuarpoq:
- Kalaallip suleqatima ilaata ima aperaanga: Qanoq ilillutit 10.000 koruunit sinnerlugit uanninngaanniit akissarsiaqarnerusinnaavit aali suleqatigiilluta, oqarpoq nangillunilu:
- Kalaallit nakkutilliisuusugut atorfininnermut atatillugu naligiimmik sooruna akissarsiaqartinneqanngitsugut, tamannalu uannut assortoruminnaallunilu assortorusunnanngilaq, taama oqaaseqarneq isumaqatiginarmat, taanna oqarpoq.
Bo Yde Sørensenip aamma erseqqissarpaa, akissarsiat naligiinnissaanut atatillugu alloriarnerusoq siulleq. Isumaqatigiinneq utaqqiisaasuuvoq taperlu ataaseq pineqarluni. Taamaattumik pingaaruteqarpoq, naligiimmik aalajangersimasumik akissarsiat nalimmassarneqartuarnissaasa sulissutigiinnarnissaat pingaaruteqarpoq:
- Soorunami nikingasoqaleqqissanngilaq, Danmarkimimi susassaqartut pingasut akornanni isumaqatigiissusiussaagut. Danmarkimi akissarsiaritinneqartut qaffanneqarpata taava Kalaallit Nunaanni aamma soorunami qaffassapput, taanna oqarpoq, nangillunilu:
- Uannut pingaarnerpaasimavoq, pingaarnerpaaginnassaarlu. Taamaammat malitseqartissavarput, taamaalillutalu Kalaallit Nunaanni suleqatitsinnut siunissamut pitsaasumik aaqqiissuteqartoqarnissaa qulakkiissallutigu.
