Pineqaatissinneqarsimasut kalunnilerneqarsinnaasut
Nunatsinni pineqaatissinneqarsimasunut inissiisarfimmiittussanngorlugit pineqaatissinneqarsimasut, inissaqannginnertik pissutigalugu utaqqisorpassuit iliuuseqarfigineqarsinnaanerannik, inatsisartuni ilaasortap Demokraatineersup Astrid Fleischer Rexip, inatsisartut suleriaasianni § 36 naapertorlugu apeqquteqaataa Naalakkersuiunit akineqarpoq.
Astrid Fleischer Rexip apeqqutaa pineqaatissinneqarsimasut singernerisigut kalunneqartussanngortitaasinananerannik imaqarpoq.
Pineqaatissinneqarsimasut parnaarussivinni inissaqanngikkaangata singernerisigut kalunnequtaasalerlugit pineqaatissinneqartarnerat Danmarkimi atorneqartarpoq.
Astrid Fleischer rexip apeqquteqaataanut, ilaqutariinnermut inatsisinillu atortitsinermut Naalakkersuisoq Aleqa Hammond akilluni allappoq, apeqqut Danmarkimi Inatsisinik atortitsinermut ministerimut Lene Espersenimut ingerlateqqissimagini, Inatsisinik atortitsinermut oqartussaaffik Danmarkimit suli akisussaaffigineqarluni ingerlanneqarmat.
Aleqa Hammond akissummini allapportaaq nunatsinni pineqaatissinneqarsimasunut inissiisarfimmiittussanngortitat utaqqisarnerat pillugu Danmarkimi inatsisinik atortitsinermut ministeri ataavartumik oqaloqatigineqartartoq.
