Piniartut Nuup eqqaani sakkutuut sungiusarnerat pillugu: Piffissaq tulluanngivippoq
Nuummi aalisartut piniartullu peqatigiiffiat NAPP piniartut naammagittaaliutaannik apuussuiffigineqarpoq tuttoqarfinni sakkutuut sungiusarnerat pillugu. Sungiusartoqarnera immini ajorinngikkaluarlugu piffissaq atugaat tulluanngissutut nalilerpaat
NAPP-mi siulittaasoq Niels Boassen KNRip umiatsiaaqqat puttasuisa eqqaanni ullaap tungaa naapisimaaraa umiatsiaaqqat umiarsualivimmiit avalallattaapput. Aavartoqaleruttorpoq qularnarsinnaavorli ulluni makkunanisut piffissami aggersumi silap piniariarfissaajumaarnissaa.
Ullunilu makkunani silap unerisimanera atorluarlugu piniartut tuttunniakaapput.
Tuttuasoqarporlu, kangerluilli ilaa pininiartut uumitsassimaartortaqarput. Uumitsaassaat silaannarmeersuuvoq sakkutuut qulimiguulii pukkeqallutik qulaattarmata sakkutuut sungiusarnerannut Arctic Lightimut atatillugu. Sungiusarneq tallimanngorneq septemberip 19-ta tungaanut ingerlassaaq.
- Qulimiguullit nipiliornerannit tuttut qimarratsinneqaqattaarput. Nuup eqqaaniinnaanngitsoq. Aammali tuttoqarfinni ungasissuni soorlu Qeqertarsuatsiaat avannannguani Kangerluarsussuarmi Nuummiit kilometererpassuarnik ungasitsigisumi, Niels Boassen KNR-mut oqarpoq.
Tuttorpassuit qimarrattarput
Pappiara takutippaa. Taanna tassaavoq aalisartut piniartullu kattuffiannut KNAPK-mut allakkami assilinera. Tassani NAPP piumasaqarpoq KNAPKp Issittumi sakkutooqarfimmut saaffiginnissuteqassasut pinialeruttorfimmi akornusersuisarnerit pinaveersimatinniarlugit.
- Tuttunniarneruna akisoorujussuaq piareersarnermilu piffissarujussuaq atugassaasarluni, Niels Boassen nassuiaavoq.
- Taqussat orsussarlu annertooq aningaasarpassuarnik akillit pisiarineqartarput Nuup eqqaa isorartoorujussuummat piniariarfinnut pitsaasunut ungusiliartoqartaruni. Taamaattumik piniartut naammagittaaliutaat takussaaleraluttuinnarput, Niels Boassen oqarpoq.
Piffissaq septemberip qeqqaniit tuttunniartunut siangisassaqarpoq. Piffissami tassani tuttut nuliungajalernerminni ataatsimuulersarput.
- Nipiliortoqartillugu tuttut eqqissisimajunnaartarput pasitsaqqajaaginnalerlutik. Qulimiguulinnik takkuttoqartillugu tuttorpassuit tiffasinnerusumut qimarrattarput. Taama pisoqartarnerani piniartut ugguartut takussaaleraluttuinnarput, Niels Boassen oqarpoq, uanilu eqqartugaani piniartut kilometererpassuit pisoqqeqqaarlutik piniakkaminnik ummiusseqqissinnaalersarput.
Taanna aamma isumaqarpoq sakkutuut septemberimi sungiusarnerat Nuummiunuinnaanngitsoq akornutaasoq.
- Ajornartorsiutit taakkoqqinnaat takuttussaapput sineriammi allami sungiusartoqartuuppat. Tuttunniarnerummi nalaani akornusersuinerit akuersaarneqarsinnaanngilluinnarput, Niels Boassen oqarpoq.
Taassuma erseqissaatigaa sungiusarneq immini NAPP-mi ajorinngikkitsik allaammi ilimagaa sungiusarnerit takussaasarumaartut. Taamaattumik NAPP-mit kissaatigineqarpoq pisussaqartillugu Issittumi sakkutooqarfimmit pitsaanerusumik attaveqartoqartassasoq akornusersuunnerit pinaveersimatinniarlugit.
