Kommune Qeqertalik ombudsmandimit isornartorsiorneqartoq
Kommune Qeqertalimmi suliami angerlarsimaffimmut inissiiniarnermut tunngasumi, angajoqqaat 2012-imili aalajangiisoqarnissaa utaqqivaat.
Suliallu sivisuallaartumik suliarineqarsimanera pillugu, ombudsmandi maanna isornartorsiuivoq.
Sulisut napparsimallutik sulinngitsoortarnerat peqqutaanerarlugu suliap uninngatinneqartarsimanera Kommune Qeqertalimmiit angajoqqaamut ombudsmandimullu nassuiaatigineqarpoq, tamannalu ombudsmandimiit aamma isorineqarpoq.
- Kommunimi sulisut napparsimanerat peqqutaanerarlugu, meeqqat angerlartinneqarnissaannut qinnuteqaat unitsinneqarsimasoq, A (angajoqqaajusoq, aaqq.) kommunimiit nalunaarfigineqarsimavoq. Kommunip sulisussanik pisariaqartunik sulisussaqannginnera peqqutigalugu suliamik unitsitsiinnarnissaq inatsisitigut tunngavissaqanngitsoq, ombudsmandi tusagassiuutinut nalunaarummi oqarpoq.
Angajoqqaajusoq naggatissaa tikillugu akiuuttoq
Meeqqanut pineqartunut marlunnut angajoqqaajusup, kommuni ukiuni qulersuarni tamaviaarluni suleqatiginiarsarisimavaa. Piffissap ingerlanerani suliaq 21-riarluni ingerlariaqqiffiusimavoq.
Angajoqqaajusoq kommunilu arlaleriarlutik ataatsimeeqatigiittarsimanerat, angajoqqaajusullu arlaleriarluni suliamik killiffissiuisarsimanera naammagittaalliuuteqartarsimaneralu ombudsmandip nalunaarusiami kinaassutsimik isertuussisumi ilisimatitsissutigaa.
Angajoqqaajusup meeqqani angerlarsimaffiup avataanut 2012-imi inissinneqarmata, ukioq taanna angerlartinneqaqqinnissaat noqqaassutigaa. 2013-imili tamatuminnga siullermeerluni itigartinneqarpoq. Angajoqqaajusorlu 2015-ip 2022-llu akornanni arlaleriarluni noqqaaqqittarsimasoq ombudsmandip nalunaarusiaani takuneqarsinnaavoq
Angajoqqaajusoq kommunimut allakkatigut qinnuteqassasoq kommunimiit 2022-mi paasitinneqartoq, tassanilu ombudsmandip suliaq ilisimalersomagaa, ombudsmandi nalunaarusiamini allappoq. Ukioq taanna meeqqani angajulleq 18-inik ukioqalerpoq.
- Kommunip suleqatima ilaata novemberip aallaqqaataani 2022-mi oqarasuaatikkut oqaloqatiginerani paasitippaa, angajoqqaajusoq junip qulingiluaanni 2021-mi meeqqami angerlartinneqarnissaanik noqqaaqqissimasoq, ombudsmandi oqarpoq.
Suliaq 2024-mi allanngorluinnarpoq. Ombudsmandip nalunaarusiaani allassimavoq angajoqqaajusoq apriilimi 2024-mi Kommune Qeqertalimmiit allagarsisimasut. Nalunaarusiaq naapertorlugu kommuni 2013-imi aalajangereersimavoq meeqqat angerlartinneqarsinnanngitsut. Taamaattumik angajoqqaajusup meeqqat angerlartinneqarnissaat noqqaassutigeqqittariaqalerpaa.
Angajoqqaajusoq maajimi 2024-mi toqukkut qimaguppoq. Ukiorlu taanna kingusinnerusumi meeqqat nukarlersaat 18-inik ukioqalerpoq.
Ombudsmandip inerniliinera
Meeqqat pillugit peqqussummi imaluunniit meeqqat tapersersorneqarnissaat pillugu inatsit naapertorlugit angajoqqaatut oqartussaassusillip angerlartitsinissamik noqqaassuteqarnissaa allakkatigut pissasoq piumasaqaataanngitsoq, ombudsmandip nalilerpaa.
- Taamaattumik kommunip angajoqqaap oqaaseqaatai tusaqqaarmagilli angerlartitsisinnaaneq pillugu paasiniaanissaq kommunip aallartissimasariaqaraa isumaqarpunga, ombudsmandi nalunaarusiamini allappoq.
Ombudsmandi isumaqarpoq qinnuteqaatinik tunniusseqqinneq suliap suliarineqarneranik sivitsorsaataannaasimasoq.
- Kommunip 2013-imi angerlartitsinissamut oqaatsitigut itigartitsillutik aalajangersimanerat tamannalu kommunip allakkiamini apriilip 24-ani 2024-meersumi angajoqqaajusumut paasissutissiissutigisimagaat maluginiarpara. Suliami paasissutissat akornanni tamanna pillugu allakkiaasimasumik takusaqanngilanga, ombudsmandi nalunaarusiamini allappoq.
Suliap ukiut qulit suliarineqarsimanera ombudsmandimit akuerineqarsinnaanngilluinnarpoq. Tamannarpiaq pissutaalluni inatsisitigut isumannaatsuutitsinissaq angajoqqaajusumut innarlerneqartoq angajoqqaajusorlu suliamik Isumaginninnermi Naammagittaalliuteqartarfimmut 2012-imili naammagittaalliuuteqarsinnaatitaasimanngitsoq, ombudsmandi oqarpoq.
KNR-ip Kommune Qeqertalik oqaaseqartikkumallugu septembarip 15-ianni saaffigaa. Kommune akissuteqareerpat sammisaq malitseqartissavarput.
