Issittumi isumannaallisaanikkut pissutsit oqaluuserisassatut salliutinneqaleraluttuinnarput.

Taamaattumik illersornissaqarfik nunatsinni Atlantikullu avannaani sakkutooqarnikkut pissassarniarlutik sakkutuut umiarsuaannik, qulimiguulinnik, timmisartunik, sakkutuunik sakkutooqarnermillu immikkut ilisimasalinnik septemberimi amerlisaassapput.

Suliniut tamanna Naalakkersuisut Illersornissamullu ministereqarfiup qanimut suleqateqarneratigut ingerlanneqarpoq, tamatumalu saniatigut nunatsinni oqartussaasut nunanilu allani suleqataasut suleqatiginissaat tapersersorneqassaaq.

Nunanut allanut ilisimatusarnermullu naalakkersuisup Vivian Motzfeldtip tusagassiuutinut nalunaarummi erseqqissarpaa, suliniuteqarnerulernissamut aamma najukkami peqataatitsinissaq pisariaqartoq.

- Illersornissaqarfiup sungiusartitsisarnermikkut Kalaallit Nunaanniinnerat takuneqarsinnaaleraluttuinnarpoq, tamannalu sungiuttariaqarparput.

- Taamaattumik innuttaasut peqataatinnissaat pingaaruteqarpoq, kikkut tamarmik ilisimaniassammassuk Illersornissaqarfik sungiusartitsiniarluni piginnaanngorsaaniarlunilu maaniinnera, aamma Naalakkersuisut suliniummut peqataanerat. Illersornissaqarfiup suliassaminnik naammassinninnissaannut sungiusartarnerat pingaaruteqarluinnarpoq. 

Nunatsinni sungiusarneq nunat tamalaaniit peqataaffiussaaq

Sakkutooqarnerup annertusarnissaanut atatillugu septembarip qulingiluaaniit 19-iata tungaanut sungiusarneq uteqattaartuartoq Arctic Light 2025 ingerlanneqassaaq.

Sakkutuut Frankrigimeersut, Tysklandimeersut, Sverigemeersut Norgemeersullu illersornissaqarfimmiit sungiusaqatigineqassapput. Sakkutuut katillugit 550-it sinnillit sungiusarnermut peqataassapput.

- Arctic Light aqqutigalugu Kalaallit Nunaata upalungaarsimanera tamarkkiisumik nukittorsarniarparput, Kalaallit Nunaannilu oqartussat nunanilu tamalaani suleqatigineqartut suleqatigalugit, Illersornissaqarfiup sakkutuui ulorianartunik assigiinngitsorpassuarnik akiuisinnaanerat sungiusassavarput,  Issittumi Sakkutooqarfimmi pisortaq, generalmajor Søren Andersen, tusagassiuutinut nalunaarummi oqarpoq.

Sakkutuut imarsiortut, timmisartortartut nunamilu sakkutuut sungiusarnermi peqataassapput, taakkulu nunami sumiiffinni assigiinngitsuni, ilaatigut Nuummi Kangerlussuarmilu, inissinneqassapput:

• Umiarsuit: Umiarsuaq alapernaarsuut Ejner Mikkelsen, sakkutuut umiarsuaat Niels Juel, umiarsuaq alapernaarsuut Thetis, franskit umiarsuaat Garonne aamma Royal Arctic Linep umiarsuaa Tilioq Arctica.
• Timmisartortartut: CL604 Challenger, timmisartut F-16, qulimiguuliit EH101 Merlin marluk aamma franskit timmisartui assigiinngitsunik atugassaqartut orsersortarlutillu assartuutit.
• Sakkutuut nunamiittut: Danmarkimi, Norgemi Sverigemilu sakkutuut, Slesvigske Fodregiment, sakkutuut immikkut ittumik suliaqartartut sakkutuullu attaveqaqatigiittarfii nunanit iligisaasuniittunit.
• Politiit: Politiit immikkut ilisimasallit.

Nunat tamalaat Kalaallit Nunaanni sakkutooqarnikkut sungiusarnerata ilagaa septembarimi sakkutuut timmisartui arlallit nunatta silaannartaani angalanissaat. Aajuna F-16-eq Kalaallit Nunaanniittoq. Assi © : Forsvaret

Suliassat sakkutooqarnermut innuttaasunullu tunngasut ukkatarineqassasut

Sakkutuut sungiusarnermi ilaatigut umiarsuarnut ikisarneq, attaveqaatit pingaarutillit paarinissaat dronenillu aqutsineq sungiusassavaat.

Sungiusarneq SNAPEX-imik taaneqartartoq (Short Notice Planned Exercise) piareersimanermik nukittorsaatissatut sunigusaataavoq, tamatumunngalu peqatigitillugu sungiusarneq Opportune Jaguar Danmarkimi ingerlanneqarpoq, tassani danskit sakkutooqarfigisaasa Issittumi iliuuseqarnernik aqutsineq ataqatigiissaarinerlu sungiusarpaat.

Aammattaaq pingaaruteqarpoq Kalaallit Nunaanni inuiaqatigiit upalungaarsimanermik ajunaarnersuarnillu iliuuseqarfiginninnermik tapersersuinissaat – assersuutigalugu ujaasinermik annaassiniarnermillu, immap avatangiisaasa illersorneqarnerannik pinngortitamilu ajunaarnersuarnik tapersersuinermikkut, ilaatigut Royal Arctic Linep umiarsuaa Tilioq Arctica suleqatigalugu.

Taamaalilluni Illersornissaqarfiup Issittumi piginnaaneqarnera nukittorsarneqaannarnani aammali Kalaallit Nunaata sillimaniarnermut politikkimut tunngasunik unammilligassaqarnissamut innuttaasunillu ikiuiniarluni pisariaqartitsisoqarnissaanut piareersimalluarnerunissaa qulakkeerneqassaaq.

Innuttaasut peqataatinneqarnissaat sungiusarnernillu ilisimatinneqarnissaat qulakkeerniarlugu Issittumi Sakkutooqarfik Nuummi, Kangerlussuarmi Sisimiunilu innuttaasunik ataatsimiititsissaaq. Ataatsimiisitsineq siulleq Nuummi ataasinngorneq 8. september Katersortarfimmi pissaaq.