Perorsaasut aningaasarsiaginnerujumallutik akerliussutsimik takutitsilersut
![](/sites/default/files/styles/image_934x467/public/article_images/arkiv-paedagoer_demonstranter_still.jpg?itok=1kZF-AbA)
Isumaginninnermut siunnersortit, ilinniartitsisut perorsaasuullu suliaat assigiipput. Tassa inulerineq ulluinnarivaat.
Ilinniartitsisulli perorsaasullu aningaasarsiaat nikingasorujussuupput. Ilinniartitsisut ukiumut 90.000 koruuninik perorsaasunit aningaasarsiaqarnerupput.
Perorsaasullu naammaginnikkunnaarlutik aningaasarsiatigut naligiimmik pineqarumapput.
Perorsaasunngorlaat qaammammut suli akileraaratik 20.588 koruunisisarput.
Ukiuni arfineq-pingasuni sulereernermi 22.339 koruuninut qaffattarpoq.
Ulluunerani paaqqinnittarfimmi pisortat suli akileraaratik 23.491 koruunisisarput.
Ukiut arfineq-pingasut sulereernermi 26.224 koruuninut qaffattarput.
- Inulerisuusugut akisussaafferujussuarmik tigusisaratta. Perorsaasuusugut inulerisut allat assigalugit suliaqartukuluusarpugut.
Akerliussutsimik takutitsinissamut Qaqortumi ataqatigiissaarisoq Sofie-Rosa Jakobsen oqarpoq.
- Ullutsinni inuuniarnermut allatigullu atugassanut sanilliullugit annikipput.
Akileraartinnani 20.000 koruunit
Nunatsinni Perorsaasut Kattuffiata, NPK-p, Namminersorlutik Oqartussanut aningaasarsiat isumaqatiginninniutigaat.
Aningaasarsiat ikittunik ilaneqassasut neqeroorutigineqartoq akerliussutsimik takutitsinissamut Nuummi ataqatigiissaarisoq Lily Mikaelsen oqarpoq.
- Anikitsuinnarnik tuniserusuppalukkamik. Uagut allatulli inulerisutulli aningaasarsiavut qaffatsikkusukkatsigit, Lily Mikaelsen Inuiaat Tillernerannut oqarpoq.
AAMMA ATUARUK Perorsaasussaaleqineq ilungersunarpoq toqqissisimanaranilu
Taamaammat perorsaasut Ilulissani, Maniitsumi, Sisimiuni, Qaqortumi Nuummilu aningaasarsiatik qaffaqqullugit sulinermilu atugassarititat pitsanngorsaavigeqqullugu aqagu tallimanngornermi nalunaaqutaq tallimat qaangerlugu tanneq pingasut akerliussutsimik takutitsilerput. Inatsisartut ukiaanerani ataatsimiilernerat iluatsillugu.
Perorsaasutut ilinniagaq bachelorgradiuvoq. Tassalu ilinniagaq Ilisimatusarfinni ilinniagartuutut aallarnisaasimanertut naligalugu ilinniartitsisut isumaginninnermullu siunnersortit qaffaseqatigaat. Perorsaasulli aningaasarsiaat ukiumut 90.000 koruuninik ikinnerupput.
Perorsaasunngorlaat qaammammut aningaasarsiaat tunngaviusut suli akileraartigatik 20.588 koruuniupput. taakkualu ukiut arfineq-pingasut atorfeqareernermi qaffasinnerpaaffissaanut 22.339 koruuninut qaffattarput.
- Ukiulluunniit 34-t perorsaasutut suliffigitigigaluaraanni akissarsiat taamaatsillugit taakkuinnaapput, Nunatsinni Perorsaasut Kattuffiani siulittaasoq Arnaq Brønlund KNR-imut oqarpoq.
Tunniutiinnarunnanngitsut
Ulluunerani paaqqinnittarfinni pisortat aningaasarsiaqarnerulaarput. Taakku qaammammut suli akileraarusernagu 23.491 koruunisisarput. Ukiut arfineq-pingasut atorfeqareernerminni aningaasarsiaat 26.224 koruuninut qaffattarlutik.
- Ukiut arfineq-pingasut sinnerlugit qanorsuaq sulitigigaluaruni, allatut aaqqiisoqanngippat, taamatut isikkoqassapput, Arnaq Brønlund oqarpoq.
Perorsaasut akerliussutsimik takutitsinissartik kinguneqassanngippat tunniutiinnarnianngillat
AAMMA ATUARUK Perorsaasussaaleqineq sanngiinnernik eqquivoq
- Akerliussutsimik takutitsinerit arlallit pisareernikuupput. Allanngortoqanngippat annerusumik iliortariaqassaagut, immaqa suliumajunnaartariaqassaagut, Lily Mikaelsen oqarpoq.
- Takussavarput. Piffissap takutissavaa pisoq una kinguneqartinneqanngippat aalassaatigineqanngippalluunniit pilersaarutit tulliinut ikaartariaqassaagut.