Perorsaasunut meeqqanullu siunissaq qaamanerusoq
Nunatsinni perorsaasutut atorfinnit 381-init 169-it kisimik atuuffigineqartut 2023-mi annertuumik misissuinerup takutippaa.
Tamatumali allanngoriartorneranut takussutissaqarpoq.
Ilulissani Perorsaanermik Ilinniarfimmit kisitsisit misissoraanni perorsaasunngorniarfimmi ilinnialersut amerlassusaat 2022 minillugu amerliartortut takuneqarsinnaavoq.
SPS-imi forstanderip Ulunnguaq Markussenip SPS-imut qinnuteqartartut sooq amerlanerulerneranut arlalinnik nassuiaatissaqarpoq. Taassuma ilinniarfiup nammineq suliniuteqarnermigut ilaatigut ilinniagaq pitsaasumik saqqummiuttarsimagaa erseqqissaatigaa.
- Ilinniarfitsinni ilinniarnermi avatangiisit pitsaasut ersarissarnissaat 2023-mili ukkataraavut. Tamanna 2024-mi qinnuteqartitsinermut pitsaasumik kinguneqarpoq, taanna oqarpoq.
Ilinniartut perorsaanermik ilinniarfimmi 2019-imi aamma 2024-mi ilinnialersussatut akuerineqarsimasut kisiisa isiginiaraanni taakku 27-nit 81-inut amerlisimapput. Taamaammat ilinniartut 200 procentimik amerlisimapput.
Annertunerusumik takusinnaasaqaleraanni ilinniarfiillu allat Ilulissani SPS-imiittut maluginiaraanni takusinnaasat pitsaasuupput. Ilinniartut 2019-imi 279-init 2024-mi 375-inut amerlisimapput. Tamanna 35 procentit missaannik qaffariarneruvoq.
Ilorraap tungaanukaartoqartoq malugineqarsinnaasoq
Naalli perorsaasunngorniarfimmut ukioq manna qinnuteqartorpassuugaluartoq taakku tamarmik ilinniakkaminnik naammassinninnissaannut nunatsinnilu paaqqutarinniffinni sulilernissaannut qulakkeerinnittoqanngilaq.
- Ilinniakkamik unitsitsiinnartartorpassuupput. Ilinniarfitsinnik naammassinnittut amerlanertigut eqimattat affaasa missaanniittarput, Ulunnguaq Markussen oqarpoq.
Taamaammat perorsaasussaaleqinerup ingerlaannartumik aaqqiivigineqarnissaa ilimananngilaq.
Pissutsit maannakkutut itsillugit kommunit allatut aaqqiissutissarsiorlutik nunatsinni paaqqutarinniffinni sulisinnaasussanut pilerinarsaapput.
Kommuneqarfik Sermersuumi soraarninngorsimasut meeraaqqerivimmi meeqqerivinnilu piffissap ilaani sulilersitsisoqarpoq, Qeqqata Kommunialu sulisussaalatsinertik pissutigalugu Kangiamiunik sulisussarsiorniarluni siorna nalunaarutigaa.
Perorsaasut Kattuffiata (NPK-p) meeqqanik paarsisussanik sulisussaaleqineq ilisarisinnaalluarpaa.
Taamaammat kattuffiup perorsaasunut atugassarititaasunik pitsanngorsaanissamut sulisitsisut qanimut suleqatigaat. Tamanna akissarsianik qaffaasoqarneranik suliffimmilu avatangiisinut pitsanngorsaanermik kinguneqarpoq. NPK-mili siulittaasup, Arnaq Brønlundip nunatsinni paaqqutarinniffinni perorsaasussaaleqinerup matussusersinnaalernissaa ukiunik arlalinnik sivisussuseqassasoq erseqqissaatigaa.
- Sulinermi atugassat akissarsiallu pitsaanngitsut. Sulianut naleqqutinngerujussuartutut inissisimasarneri amigaateqarnerlu aamma toqqammaviulluni sulinerulerneq aammalu taakku saniatigut uippakajaarnermik napparsimalernerit pisarneri takusinnaalersimagatsigit, taanna oqarpoq.
Naammagittaalliornermi suleqatigiinneq pitsaanerusoq
NPK-p sulisitsisullu akornanni perorsaasut pillugit isumaqatigiissut ukiuni tallimani atuuttussaq ukioq manna siusinnerusukkut isumaqatigiissutigineqarpoq. Sulinerup aallartinnerani akissarsiat qaffanneqarnissaat ilaatigut isumaqatigiissutigineqarpoq. Isumaqatigiissut akuerineqassaguni sulilernermi akissarsiat aallaaviusut 29.463,04 koruunimit isumaqatigiissuteqarnerup naanerani 30.062,48 koruunimut qaffanneqassapput.
Perorsaasutut ilinnialerlaap 2020-mi sulinerup aallartinnerani akissarsiaanut sanilliukkaanni taakku akileraarusiinnginnermi 20.588 koruuniupput.
Arnaq Brønlundip isumaqatigiissut nutaaq nunatsinni meeqqanut perorsaasunullu siunissamik qaamanerutitsilernissamik qulakkeerissutaasinnaalluni ilorraap tungaanut ingerlanerusoq erseqqissaatigaa.
Perorsaasunngorniarnissamulli soqutiginninnerusoqaleraluartoq ineriartornerup ingerlaavartittuarnissaa pisariaqarpoq.
Arnaq Brønlundip nammineerluni ilungersunartut taagorneqarsimasut erseqqissaannarneqarneranit kinguneqarluartussamik aaqqiissutissarsiornerup ukkatarineqarnerulerneratigut sulisitsisut akornanni suleqatigiinnerup qanoq pitsanngorsimatiginera malugisimavaa. Taamaammat siunissami qanimut suleqatigiinnerunissaq neriuutigaa.
- Sulisitsisut perorsaasut suliffimmi atugaannut atatillugu qanimut suleqatigissavagut. Amerlanerusummi ilinnialersinneqarnissaannut suleqatigiinnerunissarput pingaaruteqarpoq. Tamanna siunissami perorsaasoqarnerulernermik kinguneqarsinnaavoq, Arnaq Brønlund oqarpoq.
