Takornariaqarneq: Periarfissaasut ilisimasaqarfiginerusariaqartut

Takornariaqarneq pillugu lektori, Carina Ren, Aalborgip Universitetianeersoq naapertorlugu, Nunatta takornariarfiusinnaanera misilittagaqarfigineqarpallaanngilaq, aamma inuussutissarsiutinik ineriartortitsineq, illoqarfinnik ineriartortitsineq kulturimillu eriagisaqarneq akimorlugit takornariartitsinissamik eqqarsarneq atugaavallaanngilaq. 

- Tamakkununnga tunngatillugu suli amigaateqangaatsiartoqarunarpoq, Carina Ren taama oqarpoq.

Takornariartitsinerup inuiaqatigiinni aningaasaqarnikkut pingaarutilimmik inissisimalernissaanut aqqut suli ungasittoq sulisitsisut peqatigiiffiata GE-p ilisarisinnaagaa, GE-p takornariaqarnermut ataatsimiititaliaaneersoq Karsten Klausen taama oqarpoq.

AAMMA ATUARUK Der kommer flere turister til Grønland end nogensinde før

- Naagga, anguniagarput suli angunngilarput. Maani nunami sumiiffiit ilaanni ingerlalluartoqarpoq sumiiffiilli ilaanni susoqarpiarani, GE-meersoq oqarpoq.

Sumiiffiit ilaat takornariartitsinermik inerisaaffiusimasut misilittagaqarfiusullu, soorlu Ilulissat, allanit ilinniarfigineqarsinnaanerat Carina Renip aamma erseqqissaatigaa.

AAMMA ATUARUK Takornariat Kangerlussuarmi unnuineri amerlanerusut

Takornariartitsinermi periarfissat takusinnaallualernissaasa sulissutigineqartariaqarnera Visit Greenlandip aamma isumaqataaffigaa, pisortalli Anders Stenbakkenip takornariartitsinerup Nunatsinni aningaasarsiornermik pilersitsisinnaanerata ilisimaneqarnerulernera aamma tikkuarpaa.

- Naagga, angusassarput suli angunngilarput. Ajornerusumut ingerlavugut?, naagga taamaanngilluinnarpoq. Pitsaanerusumut ingerlavagut, aamma nunap immikkoortuini arlalinni takornariartitsisartunik nutaanik aallartittoqartarnera, najukkamilu takornariartitsisartut nunani allani takornariartitsivinnik suleqateqalersarnerat takujuarparput, pisortaq taama oqarpoq.

AAMMA ATUARUK Silap pissusiata allanngoriartornera takornariaqarnermut iluaqutaasinnaasoq