Takornariat Kangerlussuarmi unnuineri amerlanerusut

Visit Greenland, Qeqqata Kommunianik Arctic Circle Businessimillu suleqateqartoq, misissuereerluni taama inerniliivoq. 

Misissukkamilu inerniliunneqartoq pitsaasumik tupaallatsitsivoq.

Kisitsisit nikingapput

Takornariat katillugit 17.268-it Kangerlussuarmi akunnittarfimmi siorna unnuisut, Naatsorsueqqissaartarfiup kisitsisaataasa takutippaat.

- Taannali nikingavoq. Akunnittarfiit minnerit nalunaarsuinissamik pisussaaffilerneqanngimmata nalunaarsuineq ajorput, pisortaq oqarpoq.

Kangerlussuarmut takornariartut qanoq amerlatigisimaneri paasisaqarfiginerorusullugu Kangerlussuarmi takornarialerisut attaveqarfigineqarput. 

- Takornariat Kalaallit Nunaanniit aallartut nalunaarsorneqarneri aallaavigiinnarlugu nutaamik paasisaqarpugut.

Kisitsisimmi takutippaat akunnittarfinni minnerni siorna unnuisut 10.179-iusut. Taakkulu Naatsorsueqqissaartarfiup kisitsisataanut ilanngukkaanni Nunarput minnerpaamik 27.000-inik siorna takornariaqarsimavoq, aningaasallu isertinneqartut minnerpaamik 70 millionit koruuniullutik.

- Takornariat 17.268-it nalunaarsorneqarsimappata, 10.000-illu mininneqarsimallutik, soqutiginartortaqaqaaq. Illoqarfinni allani aamma taamaattoqarsimassanerluni? Tamanna ilimagaara.

Aningaasat isertinneqartut

Visit Greenland, Qeqqata Kommunia Arctic Circle Businnessilu suleqatigalugit, takornariaqarnerup destination Arctic Circlemut qanoq pingaaruteqartiginera paasiniarlugu misissuivoq.

Pisortallu neriuutigaa misissueriaaseq una nunap sinneranut siammarterlugu atorneqassasoq.

- Tikittut nalunaarsorneqarneri saniatigut, aningaasat Nunatsinnut isertinneqartut qassiuneri aamma paasisaqarfiginerussagaluarparput, Visit Greenlandimi pisortaq Anders Stenbakken oqarpoq.