Silap pissusiata allanngoriartornera takornariaqarnermut iluaqutaasinnaasoq
Takornariartitsinermut tunngasunut ilisimatusarsimasoq Carina Bregnholm Ren, Danmarkimi aviisit ilaannut Kristeligt Dagbladimut taama oqarpoq.
Takornariat nunatsinnukartartut ukiuni kingullerni amerliartorsimapput. 2014-imi 80.000-ingajaapput, siornalu 2016-imi 96.000-iusimallutik.
Issittullu ukiuni makkunani oqallisaanerujussua, silallu pissusiata allanngoriartornerata malitsigisai matumani pissutaanerpaapput, Nunattami nunani tamalaani tusagassiuutini sammineqarnerujussua ilaatigut pissutaalluni takornariat amerliartulersimapput.
- Inuit Sermersuaq takorusuppaat, aakkiartunnginnerani takorusullugu, Carina Bregnholm Ren, Aalborg Universitetimeersoq, Kristeligt Dagbladimut oqarpoq.
Taamatullu naliliisoqarnera Visit Greenlandip ilisarisinnaavaa. Visit Greenlandip pisortaa Anders Stenbakken taama oqarpoq:
- Kalaallit Nunaat tusagassiuutini ataatsimut isigalugu sammineqarnerulersimavoq. Silammi pissusiata allanngoriartornerata sunniuteqaatai tamaani ilaatigut takuneqarsinnaapput. Sermit iigartartut aakkiartuinnartut Kalaallit Nunaanni takuneqarsinnaapput, silap pissusiata allanngoriartornerata kinguneri tassani takuneqarsinnaallutik, Anders Stenbakken, Kristeligt Dagbladimut oqarpoq.
