Peqqinnissaqarfimmut millionikkaanik ikiorsiissuteqartoqarniartoq
![](/sites/default/files/styles/image_934x467/public/article_images/7v9a9837.jpg?itok=BIWZio8r)
Atorfinitsitsiniarnerup ajornartorsiutaanera, utoqqaat amerliartortut innuttaasullu ataasiakkaat ataatsimut pisariaqartitsinerat peqqinnissaqarfitsinnut ilungersuatitsipput.
Ima ilungersuatitsitigivoq allaat danskit naalakkersuisui maanna aningaasatigut ikiorsiissuteqarniarlutik. Tamanna siunnersuutigineqarpoq.
Danskit naalakkersuisuisa danskit aningaasanut inatsisissatut siunnersuutaanni 140 millionit koruunit Kalaallit Nunaanni peqqinnissamut aningaasaliissutinut immikkoortippaat.
Danskit Nunamut imminermut Peqqinnissamullu ministereqarfiat tusagassiuutinut nalunaarummi marlunngornermi ualikkut allappoq.
Utertillugit akiliutigineqassanngitsut
Danskit Nunamut imminermut Peqqinnissamullu ministeriat, Sophie Løhde ikiuinissaq pillugu ima oqarpoq:
- Kalaallit peqqinnissaqarfiat ilungersualluinnarpoq, ukiuinilu aggersuni tunngaviusumik allannguutit misissortussaallugit. Taamaammat naalakkersuisunit kalaallinut aningaasatigut ikiorsiissuteqarusuppugut.
Danmarkimit peqqinnissamut aningaasaliissutit nutaat Naalakkersuisut kalaallit peqqissariartortinneqartut akeqanngitsumik peqqissarneqartarnissaannik siorna qinnuteqarnerata kinguneraa. Peqqinnissaqarfimmi isumalluutit taamaalillutik allamut atorneqarsinnaassallutik.
- Danskit tungaanniit peqqinnissamut aningaasaliissutit (tassa taakku 140 millionit aaqq.) kalaallit peqqinnissaqarfiata assersuutigalugu kræftertunut uummalluttunullu danskit napparsimmaviinut peqqissartikkiartortunut aningaasartuutigisartagaanut atorneqarsinnaassasut takorloorparput, ministeri oqarpoq.
Peqqinnissaqarfik allanngoriartortoq
Peqqinnissaqarfipput ilungersuasoq innersuussutit 100-t peqqinnissaqarfiup siunissaanut nutaamik sinaakkusiippat allannguiffiungaatsiartussaavoq.
Innersuussutit taakku 100-t nunatsinni peqqinnissaq pillugu ataatsimiititaliarsuup suliaanit 2023-mi maajimi naammassineqartumeerput.
Peqqinnissaqarfik Aningaasaqarnermut Akileraartarnermullu naalakkersuisup, Erik Jensenip ukiunut tulliuttunut sisamanut aningaasanut inatsisissatut siunnersuummik saqqummersitsinerani aamma oqallisigineqarpoq.
Tassanimi peqqinnissaqarfimmut 2028-p tungaanut 74,4 millionit koruuninik saniatigut aningaasaliisoqarniarpoq.
Peqqinnissaqarfik ilumut Danmarkimit aningaasatigut tunineqassanersoq suli nalunarpoq, siunnersuummi suli akuerineqanngilaq.
- Kalaallit peqqinnissamut naalakkersuisoqarfiat peqatigalugu aalajangersimasumik maanna suliaqarniarpugut, Sophie Løhde tusagassiuutinut nalunaarummi oqarpoq.
Naalakkersuisut immikkoortitaannut 74,4 millioninut tunngatillugu aamma taamaattoqarpoq.
Aningaasanut inatsisissatut siunnersuut Erik Jensenip sapaatip akunnerata siuliani saqqummiussaa Inatsisartuni ukiakkut ataatsimiinnermi oqaluuserineqassaaq.