Aningaasaqarneq patajaannerusoq aningaasanut inatsisissamut nutaamut sinneqartooruteqartitsisoq
![](/sites/default/files/styles/image_934x467/public/2024-08/Erik%20Jensen%20finanslov%20stills%20.00_04_00_46.Still002.jpg?itok=2B9b-Lyb)
Peqqinnissaqarnermut susassaqarfik ukiunut tulliuttunut periarfissarissaarpoq.
Tamanna aningaasanut inatsisissatut siunnersuummi nutaami, aningaasaqarnermut akileraartarnermullu naalakkersuisup, Erik Jensenip pingasunngornermi saqqummiussaani allaassimavoq.
- Naalakkersuisut eqqortumik pingaarnersiuinissaannut soorunami unammillernarnikuuvoq. Kikkummi tamarmik aningaasanik amerlanerusunik soorunami pissarsiaqarusupput.
- Kisianni naalakkersuisunit aningaasanut inatsisissatut siunnersuut pingasunik pingaarnertut siunnersuuteqarfigaarput. Tassa peqqinnissaqarnermut, meeqqanut, inuusuttunut innarluutilinnullu aamma ilinniartitaanermut aningaasaliinerunissaq, Erik Jensen oqarpoq.
Peqqinnissaqarneq aningaasanut inatsisissatut siunnersuummi annerpaamik pilersaarutigineqarfigeqqippoq, tassungalu ukiunut tulliuttunut sisamanut 74,4 millionit koruunit atorniarneqarlutik.
Aningaasat nakorsaaneqarfimmik pitsanngorsaanermut aamma nakorsanik amerlanerusunik nunatsinni atorfinitsitsinissamut ilaatigut atorneqassapput.
Tamatuma saniatigut piumassuserinngisaminnik kinguaassiorsinnaanngitsunut nakorsaanissamut 8,7 millionit koruunit atorneqassapput. Siorna aningaasanut inatsisissatut siunnersuummi kinguaassiorsinnaanissamut nakorsaanissamut aamma aningaasanik immikkoortitsisoqarpoq.
Aningaasanulli inatsit piareermat piumassuserinngisaminnik kinguaassiorsinnaanngitsunut aningaasat nassaarineqarsinnaanngillat.
Erik Jensen, taama pisoqaqqinnginnissaa qanoq qulakkeerniarpisiuk?
- Peqqinnissamut naalakkersuisoq, Agathe Fontain (IA) isumasioqatiginikuuara, tassanilu ingerlariutsit atorsimanerigut erseqqissarnikuuarput.
Siumup siulittaasuata oqarnera naapertorlugu siorna aningaasanut inatsimmi piumassuserinngisaminnik kinguaassiorsinnaanngitsunut aningaasaliissutiginiarneqartut Inatsisartuni pingaarnersiorneqarsimanngillat. Taamaammallu kinguaassiorsinnaanngitsunut nakorsaanissamut aningaasat suliniutinut allanut ingerlateqqinneqarlutik.
- Kisianni soorunami ukkatarivarput, taamaammat aningaasanik immikkoortitsivugut. Qanoq pisoqarnikuunera ajuusaarnartuusoraarput, taamaammat aningaasanik tassunga immikkoortitsisoqassaaq, Erik Jensen oqarpoq.
Suliffissaaleqisut ukiuni qulini aatsaat taama ikitsigisut
Aningaasanut inatsisissatut siunnersuut misissoraanni nunatta aningaasaqarnera siumut ingerlavoq.
Erik Jensenip oqarnera naapertorlugu nunarput ukiuni kingullerni ilungersuasoqarnera qaangerluarpaa, suliffissaaleqisullu aatsaat taama ikitsigipput.
Suliffissarsiortutulli allatsissimasut ukiuni qulini aatsaat taama ikitsigipput.
Taamaakkaluartorli aningaasanut inatsisissatut missingersuummi siornamut sanilliullugu sinneqartoorutissat ikinnerupput. Sinneqartoorutissatummi missinngersuutit 103,3 millionit koruuniupput. Siornalu missingersuutigineqartut 284,4 millionit koruuniullutik.
- Siorna aningaasanut inatsimmi immaqa allannguivallaaratalu mianersorpallaarsimavugut. Taamaammat soorunami assersuutigalugu innarluutilinnut, utoqqarnut peqqinnissamullu tunngatillugu aningaasanik atuinerunissatsinnut inissaqartitsivugut.
- Aamma ilisimaneqartutulli suliffissaaleqisut ikittunnguullutillu suliffeqartut amerlapput, tamannalu pissutigalugu maannakkut aningaasaqarnikkut patajaannerusumiippugut. Taamaammat susassaqarfinnut taakkununnga aningaasaliinerunissamut inissaqartitsivugut, naalakkersuisoq oqarpoq.
Erik Jensenilli oqarnera naapertorlugu nunatta aningaasaqarnera ingerlalluarpasikkaluartoq nunatta karsianut aningaasat affaat sinnerlugit nunatta avataanit suli pissarsiarisarpagut.
Aningaasat 53 procentii suli Danmarkimit tapiissutaasarput. Taamaattoqartariaqanngikkaluartorlu taanna oqarpoq.
- Pisortat ingerlataanni aningaasanik atuinikinneruniarpugut, tassanilu sipaarniarnissamut periarfissarissaarluta. Pingaartumik allaffissornermi aningaasartuutit. Nunatta karsianut isertitaqarnerunissaq kissaatigaarput, taamaalilluta naalagaaffimmit tapiissutit pisariaqartinnginnerulissallutigit, taanna oqarpoq.
Erik Jensen aningaasanut inatsisissatut siunnersuutip taama isikkoqartillugu Inatsisartuni akuerineqarnissaa ilimagaajuk?
- Tunuliaqutagu tatigilluarpakka aningaasanullu inatsisip novembarimi piareersimanissaa soorunami naatsorsuutigalugu.