Aningaasanut inatsisissatut siunnersuut: Peqqinnissaqarfik tapiissuteqarfigineqaqqittoq
![](/sites/default/files/styles/image_934x467/public/2024-08/454496063_4019447738283884_6880260903471085688_n.jpg?h=c4c1d1d3&itok=HV8KOpGt)
Akileraartarnermut Aningaasaqarnermullu naalakkersuisup Erik Jensenip ukiunut tulliuttunut sisamanut aningaasanut inatsisissatut siunnersuut saqqummiuppaa.
Aningaasanut inatsimmi 2025-mit 2028-mut atuuttussatut siunnersuummi peqqinnissaqarfik annerpaavoq. Politikerit peqqinnissaqarfimmik pitsanngorsaanissamut aningaasanik ukioq manna immikkoortitsingaatsiaqqipput.
Peqqinnissaqarfik ukiunut sisamanut 74,7 millionit koruuninik saniatigut pissarsissasoq, siunnersuummi allassimavoq.
Aningaasat ilarpassui Dronning Ingridip Napparsimmavissuanut atorneqassapput. Napparsimmavik 30 millioninik saniatigut tunineqassaaq.
Aningaasat ilarujussuit napparsimmavimmi sulisunik nutaanik 11-nik atorfinitsitsinissamut atorneqassapput.
Peqqinnissamik siunnersuisoqatigiit nutaat
Peqqinnissamik siunnersuisoqatigiit arlaannulluunniit attumassuteqanngitsunut aningaasanik immikkoortitsisoqartoq aningaasanut inatsisissatut siunnersuummi aamma atuarneqarsinnaavoq.
Siunnersuisoqatigiinnik pilersitsinissamut katillugit 800.000 koruunit immikkoortinneqarput.
Siunnersuisoqatigiit peqqinnissaqarfiup ineriartornerannik malinnaanissaa nalilersuinissaalu siunertaavoq.
Susassaqarfimmik naliliinerit pilersaarutit periusissiallu atuutsilerneqarnissaannut malinnaanissamut atorneqassapput. Siunnersuisoqatigiit susassaqarfimmik pitsanngorsaanissamut aamma siunnersuuteqartassaaq.
Napparsimasunut taarsiissuteqarneq
Aningaasanut inatsisissatut siunnersuummi 8,7 millionit koruunit napparsimasunut taarsiissuteqarnissanut aamma immikkoortinneqarput. Tamanna Naammagittaalliuteqarnermut aamma Taarsiissuteqarnermut inatsisip Inatsisartuni upernaaq atuutilersup malitsigaa.
Taama inatsiseqalerneratigut nunarput maalaaruteqarfissanik siullermeertumik aaqqissuussaqalissaaq. Taarsiiffiginnissamut malittarisassat nalinginnaasut atorlugit maannamut taarsiiffiginnittoqartaraluarpoq.
Kinguaassiorsinnaanissamut nakorsartinneq
Siorna aningaasanut inatsisissatut siunnersuummi upernaaq tikillugu ajornartorsiutigineqartoq kinguaassiorsinnaanissamut nakorsartittoqartarneranut tunngavoq.
Inatsisartuni partiit tamarmik nunatsinni piumassuserinngisaminnik kinguaassiorsinnaanngitsut ikiorneqarnissaannut 10 millionit koruuningajannik immikkoortitsiniaraluarput. Inatsilli naammassimmat aningaasat iluamik nassuiaatigineqarsinnaanngitsumik tassanngaannartumik tammarput.
Kinguaassiorsinnaanngitsunut tunngatillugu ukioq manna kukkuluttortoqaqqissanersoq ilisimanngilarput.
Danmarkimi IVF-imik nakorsartinnissamut 7,7 millionit koruuninik immikkoortitsisoqaqqippoq, saniatigullu aappariit nakorsartinnermut atatillugu inissisimmaffigisassannut millioninik aamma immikkoortitsisoqarluni.
Taamaammat aningaasat inatsisip ukioq manna kingusinnerusukkut akuerineqarneranni suli nassaassaanissaat neriuutigineqaannassaaq.