Peqqinnissaqarfik ataatsimiissutigereerlugu illuatungiliuttut mianersortumik nuannaarutissaqartut
Illuatungiliuttut peqqinnissaqarnermik isumaqatigiissuteqarnissaq pillugu ataatsimiinnissamut Naalakkersuisunit qaaqquneqarmata pisorpaluttoqaqaaq.
Qaaqqussummimi naalakkersuisooqatigiit peqqinnissaqarfiup iluani qanoq anguniagaqarusussuseqarnerannik allaqqasoqanngivippoq.
Illuatungiliuttuni qinikkat taamaammat qularlutik peqqissutsimut naalakkersuisumik Agathe Fontainimik (IA) tallimanngormat ataatsimeeqateqariartorput.
Qularpalunnerli mumissimavoq.
- Tupaallappunga. Agathe Fontain ataatsimeeqatigiartoratsigu piareersarluarsimavoq Naalakkersuisullu peqqinnissaqarfiup qanoq pineqarnissaa pillugu ersarissunik pingaarnersiuisimallutik. Ataatsimiinneq taamaammat ingerlalluarpoq, Atassutip siulittaasua Aqqalu Jerimiassen oqarpoq.
Oqaatsit assingusut ataatsimiinneq sioqqullugu naammaginninnginnerminnik oqariartuuteqarsimasunit, Demokraatit sinnerlugit Inatsisartut peqqissutsimut ataatsimiititaliaani ilaasortamit Bjørk Lange Olsenimit Naleqqamiillu Jens Napãtuumit anninneqarput:
- Naatsorsuutigisaqarpallaanngilanga nuannersumilli tupaallatsinneqarlunga misigisimallungalu Naalakkersuisut suliatik nalunngikkaat. Isummersinnaasumik tusarnaarsinnaasumillu naalakkersuisoqalersimavugut. Tamanna nuannaarutissaavoq, Jens Napãtôk’ oqarpoq.
Atassut: Ambulancenut nungullartunut aningaasat
Partiinit illuatungiliuttunit pingasunit oqaatigineqartut naapertorlugit peqqinnissaqarfimmi ajornartorsiutit pinarnerpaat massakkut aaqqiissuteqarfiginissaat pillugu peqqinnissamut isumaqatigiissuteqarnissaq Naalakkersuisunit pilersaarutigineqarpoq. Annertunerusumik aaqqissuusseqqinnissaq pineqanngilaq, naak tamanna sivisuumik nilliaatigineqarsimagaluartoq.
Atassummeersup Aqqalu Jerimiassenip peqqinnissaqarnermik annertunerusumik aaqqissuusseqqittoqartariaqarnera isumaqatigigaluarlugu aamma isumaqarpoq qaangerniagassaqartoq sukkasuumik naalakkersuinikkut iliuuseqarfigineqartariaqartunik:
- Suut tamaasa ataatsikkut aaqqiissuteqarfigisinnaangilavut. Massakkoqqissaaq ambulancenik pinartumik ajornartorsiuteqarpugut. Ilai ingerlarpiarsinnaanngillalluunniit atortullu nungullarsimallutik. Ajornartorsiutit aaqqiiviginngikkutsigit inuunermik naleqarsinnaavoq, oqarpoq.
Demokraatit Nalerarlu: Peqqinnissaqarfiup assaat amerlanerusut pisariaqartippai
Demokraatinit immikkut maluginiarneqarpoq atorfinitsitsiniarnerup pitsanngorsarnissaanut aningaasanik amerlanerusunik Naalakkersuisut atuiniarmata. Partiimiimmi sivisuumik tunngavilersuutigineqartarsimavoq Nunat Avannarliit avataanni sulisussarsiortarneq pikkoriffigineqarnerulertariaqartoq.
Taamatut oqareerlutik peqqinnissaqarfimmi tunngaviusumik ajornartorsiutigineqartut qanoq iliuuseqarfigineqarnissaannut piffissaq ungasinnerusoq eqqarsaatigalugu Naalakkersuisut pilersaarusiornissaat partiimit maqaasineqarpoq.
- Naalakkersuisunit piffissamut ungasinnerusumut anguniagaqarusussuseqarneq amigaatigaarput. Assersuutigalugu Peqqinnissaq pillugu isumalioqatigiissitamit innersuussuterpassuit qanoq pissavavut? Naalakkersuisut iliuuseqartussaapput. Akisussaaffigaat, Bjørk Lange Olsen oqarpoq.
Naleqqamiit Peqqinnissaqarfiup sulisussaaleqinera aamma ernumanartippaat. Partii nunatsinni nakorsassaaleqinerup qanoq annikillisarneqarnissaa pillugu iliuusissatut pilersaarusiortoqarnissaanik 2019-imi siunnersuuteqarpoq.
Taamani Jens NapãtôK´ tapersersorneqarpallaanngilaq oqarporli tamanna allanngorsimasoq.
- Nuummi sinerissallu sinnerani ajornannginnerusumik nakorsiartoqarsinnaalernissaanik Naleqqap kissaateqarneranut Naalakkersuisoq tusaaniarpoq. Matumani nakorsassaaleqinerup annikillisarnissaanut aningaasaliinissamut nakorsallu peqqinnissaqarfimmik oqilisaasinnaanissaannik nutaamik aaqqiissuteqarnissamut 2019-imi siunnersuutiga eqqarsaatigaara, Jens NapãtôK´ oqarpoq.
Partiit illuatungiliuttut pingasut KNR-imut oqarput, pissutsit pitsaanngorsarneqassappata peqqinnissaqarfimmut amerlanerusunik aningaasaliisoqartariaqartoq.
Agathe Fontain: Aaqqissuusseqqinneq aallartinneqarpoq
Peqqinnissaq pillugu nutaamik isumaqatigiissuteqarnissamut isumaqatiginninniarnerit peqqissutsimut naalakkersuisunngoqqammersumit Agathe Fontainimit aqunneqarpoq.
Partiit sinneri assigalugit ataatsimiinnerup siulliup ingerlasimanera naammagisimaarpaa:
- Ataatsimiinneq ingerlalluartoq isumaqarpunga. Paaseqatigiippugut, KNR-imut oqarpoq.
Naalakkersuisorli isumaqatiginninniarnerit pillugit oqaaseqarnerunissaminik tunuarsimaarpoq. Partiit suut pillugit isumaqatiginninniarnersut imaluunniit peqqinnissaqarfimmut tatisimaneqartumut amerlanerusunik aningaasaliisoqassanersoq pillugit apeqqutinut akissuteqarumanngilaq.
Agathe Fontain peqqinnissaqarnermik aaqqissuusseqqinnerup sivisuumik utaqqineqarsimasup qanoq ingerlanera pillugu allatut aamma isumaqarpoq. Naalakkersuisooqatigiinnit iliuuseqartoqarnissaa partiinit illuatungiliuttunit maqaasineqartoq, sulineq aallartereersimasoq Agathe Fontain isumaqarpoq.
- Aningaasanut inatsit peqqinnissaqarnermillu aaqqissuusseqqinneq nutaaq ataqatigiipput. Sulineq aallartereerpoq, oqarpoq.
