Ataatsimiititaliarsuaq: Peqqissaasut Peqqinnissaqarfimmiit qimarrapput

Peqqinnissaqarfimmi atorfiit katillugit 1600-t missaanniipput, taakkunanngalu 1500-t missaat piffissami kingullermi inuttalerput.

Peqqinnissaq pillugu Ataatsimiititaliarsuup isumaliutissiissutaani sapaatit akunneranni uani ataasinngornermi saqqummertumi kisitsisini erserpoq.

Peqqissaasut ingammik taarseraateqaat. Peqqissaasusutut ilinniagalinni kalaallisut oqaaseqartut 53 procentiisa missaat peqqissaasutut sulinatik allamik atorfeqarput.

Louise Olsen peqqissaasutut ilinniagalinnut ilaavoq, taanna Peqqinnissaqarfimmi ingerlalluanngitsumi sulerusunngilaq. Maannakkut naminnersortutut qimeriaasalersuisartuullunilu qallulerisuuvoq.

- Ulluinnarni taamatut qimorululluta suliuarneq, nammineq meeraqalereerluni angerlarluni qasupilulluni, taamaattutut anaanaarusunnanga. Taarseraatiinnaavik, taamatut nammineq fastiulluni ilinniartitseruusaaginnaavinneq, taakku pisut uteqattaaginnaavinneri aamma qasunarsinnaasarpoq.

Taannalu taama misigisimasuni kisiartaaqqajanngitsoq, Peqqissaasut Kattuffiata siulittaasua, Ken Hansen, oqarpoq:

- Amerlasoorparujussuit assoroorlutik sulipput, imatut paasillugu ulapittorujussuupput. Ulapippallaarujussuarput. Amerlavallaartunik suliassaqarput. Ingammik aalajangersimasunik atorfillit. 

Ajornartorsiutit qaangeruminaatsut pineqarput. Sulisut taarseraannerujussuat pissutigalugu peqqinnissaqarfimmi aalajangersimasunik atorfeqartunut uippakajaartitsipput - taakkualu kingunerisaannik sulisut taarseraannnerulerlutik:

- Sulisut nutaat ilinniartinneqartuartarnerat pineqarpoq, nutaanik sulisoqalertuaannarnera pissutigalugu taakkua ilinniartinneqartuaannavittussaapput. Suliassap tamassuma suliariinnavinnissaanut aalajangersimasunik atorfilinnut ilungersunartorujussuuvoq.

Peqqissaasut peqqissaasutut sulileqqinnissaannut kajumissuseqalernissaanut Ken Hansenip taasai tassaapput , akissarsiat pitsaanerusut, ingerlariaqqinnissamut periarfissagissaarnerunissaq, nunat allamiut napparsimmaviinik suleqateqarneq suliffimmilu avatanngisit pitsaanerulernissaat. 

Tamannalu maannakkut pisariaqartoq, ajornatorsiutaalereersormi unitsinneqarsinnaanavianngitsoq Ken Hanseni isumaqarpoq:

- Ajornartorsiut uteqqittuartoq anigorneqarsinnaanngippat siunissaq unammillernarsinnaavoq. Peqqinnissaq pillugu ataatsimiititaliarsuup isumaliutissiissutai maanna saqqummiunneqarput piaartumillu naammasineqartussaapput. Utaqqeqqissinnnaanngilagut.

Louise Olsen Peqqinnissaqarfimmi sulisuulluni atugassarititaasut pitsaanerulerpata uterusussanersoq aperaarput:

- Kiffaanngissuserujussuaq misigereerpara maani, takorloorsinnaanngikkallarpara.