Peqqinnissaq pillugu ataatsimiititaliaq taperserneqangaatsiartoq

Peqqinnissaq pillugu ataatsimiititaliap peqqinnissaqarfiup qanoq pitsanngorsarneqarnissaa, ataavartunik sulisoqarnissap pitsaanerulersinneqarsinnaa ilaatigut innersuussutigisassavai, Suleqatigiissitsisut siunnersuuteqarput. Siunnersuut Inatsisartuni partiinit qassiiusunit taperserneqarpoq.
Suleqatigiissitsisut ataatsimiititaliaq suliamik ilisimannittunik ilaatigut inuttaqartinniarpaa, taakkulu nunatsinni peqqinnissamik isumaginnittut qanoq pitsanngorsarneqarsinnaanerat peqqussuteqarfigisassavaat. Assi © : Camilla Dam/KNR
oktobarip 15-at 2019 06:24
Nutserisoq Connie Fontain

- Peqqinnissaqarfimmik aaqqissuusseqqinnissaq qularutissaanngilaq. Sulianik suliarinnittartut politikkikkut naammattumik peqataatinneq ajorpagut, Suleqatigiissitsisut peqqinnissaq pillugu ataatsimiititaliornissamut siunnersuummini taama tunngaviliipput.

Suleqatigiissitsisut ataatsimiititaliaq suliamik ilisimannittunik ilaatigut inuttaqartinniarpaa, taakkulu nunatsinni peqqinnissamik isumaginnittut qanoq pitsanngorsarneqarsinnaanerat peqqussuteqarfigisassavaat:

AAMMA ATUARUK Svært med politisk indgriben

- Minnerpaamik peqqinnissamik suliaqartut kattuffii aamma soqutisaqartut Kalaallit Nunaanni peqqinnissaqarfissaqarfimmi suliaqarnermik ilisimasaqartut ataatsimiititaliarsuarmi sinniisoqassapput, Suleqatigiissitsisunit Tillie Martinussenip siunnersuutaani allassimavoq.

Ataatsimiititaliap amigaataanera Naalakkersuisut isumaqatigigaat

Ataatsimiititaliattaaq katsarsaanermi Danmark nunallu allat qanoq suleqatiginerulerneqarsinnaanersut aamma misissussavai.

Suleqatigiissitsisullu allanit siunnersuuteqartoqarnissaa ammaffigaa, ataatsimiititaliammi Inatsisartunit amerlanerussuteqarfigineqarnissaa kissaatigaa.

Peqqinnissaq pillugu ataatsimiititaliaq piviusunngortinneqarsinnaalluarpoq.

Tassami siunnersuut siullermeerneqarmat Naalakkersuisut partiillu allat Suleqatigiissitsisunut isumaqataalluarput.

AAMMA ATUARUK Bøjlilertinnissamut misissuinerit sukateriffigineqartut

Peqqinnissamut naalakkersuisup, Martha Abelsenip (S) peqqinnissaq pillugu ikiorsiissutit assigiinngitsut pillugit misissuisoqaleruttortoq erseqqissaatigaa, Naalakkersuisulli ataatsimiititaliap pisariaqartinneqarnera isumaqatigaat.

Partiit angisuut Siumut Inuit Ataqatigiillu peqqinnissaq pillugu ataatsimiititaliaqalernissaanut tapersiipput. Naalakkersuisooqatigiillu tapersersortaata 2020-mut aningaasanut inatsimmi ataatsimiititaliap pilersinneqarnissaanut aningaasaliisoqartariaqarnerarpaa.

Martinussen: Tallikka ammoortissinnaanngingajappakka

Tillie Martinussenip tapersiilluartoqarnera nuannaarutigaa:

- Siunnersuummut tapersersuisoqangaarmat tallikka ammoortinneq sapingajappakka, Tillie Martinussen oqarpoq.

Peqqinnissaq pillugu susassaqarfik ima pingaartigimmat allaat peqqinnissaqarfiup allanngortinneqarnissaanut isumaqatigiissuteqartoqartariaqartoq Martinussen isumaqarpoq:

- Tapersersorneqarluarnissaq pingaartorujussuuvoq, taamaalilluni tamarmik suliami ilaasinnaammata torersuussallunilu. Kikkut tamarmik matumani piginnittuupput, tamannalu qinigaaffiup piffissaanit sivisunerusinnaanissaa naatsorsuutigineqarsinnaavoq, Tillie Martinussen oqarpoq.

AAMMA ATUARUK Nalunaarusiaq: Nunatsinni peqqinnissaqarfimmut aningaasartuutit nunanut allanut sanilliullugit ikinnerupput

Peqqinnissaqarneq nunatsinni suli oqallisigineqartartuni annertuuniippoq. Oqallinnerlu Aningaasaatit pillugit siunnersuisooqatigiit Nunatta Aningaasaqarneranut ukiumoortumik nalunaarusiaminni peqqinnissaqarfimmik ukkataqarniarluni aalajangerneratigut qaqeqqinneqarpoq.

Peqqinnissaqarfik nunap ilusilersugaanera, sulisut nikerarujussuarnera pissutigalugu ilungersorpoq, taavalu nunatsinni peqqinnissaqarfimmut assersuutigalugu Islandimit, Savalimmiuniillu annikinnerusumik aningaasanik atuisarpugut, siunnersuisooqatigiit inerniliinerata ilaani allassimavoq.

Peqqinnissaq pillugu ataatsimiititaliaqalernissaanut siunnersuut Ilaqutariit Peqqinnissarlu pillugit ataatsimiititaliamut maanna suliassanngortillugu nassiunneqarpoq.