Ittoqqortoormiuni nakorsaqannginnissaa Martha Abelsen Isumaqarpunga politikkikkut akuliuffigiuminaatsoq

Ittoqqortoormiini julimi aggustimilu nakorsaqarnavianngittoq sapaatip akunnerata aallartinnerani oqaluttuaraarput. Tamanna Nunatsinni nakorsassaaleqinermik pissuteqartoq, peqqinissaqarfiup oqaatigaa. Peqqinnissamulli Naalakkersuisup politikkikkut iliuuseqarsinnaannginnerarpoq.
Assi © : Virna Kromann
Allattoq Anna P. Knudsen
juunip 20-at 2019 07:28

Ittoqqortoormiini decembarip qaammataani januarimilu nakorsaqarsimanngitsoq, maannalu juulimi aggustimilu nakorsaqassanngitsoq Peqqinnissaqarfiup Sermersuup immikkoortuani nakorsat pisortaa Jesper S. Olesen oqarpoq.

Ittoqqortoormiinilu nakorsaqartussaannginnera Peqqinnissamut Naalakkersuisup ima qisuariarfigaa:
 - Soorunami akuerineqarsinnaanngilaq.

Ajornartorsiulli toqqaanaq iliuuseqarfiginianngilaa.

 - Ittoqqortoormiini imaluunniit illoqarfinni allanut nakorsaqanngitsunut qanoq isillunga nakorsanik tikisitsisinnaannissamut isumaqarpunga uanga politikkikkut akuliuffigiuminaatsoq, Martha Abelsen oqarpoq.

Taassuma naalakkersuisoqarfimi iliusai naammagai.

 - Innuttaasut toqqissisimatinniarlugit iliuusissanik assigiinngitsunik suliaqarput. Taavalu taakku ataqqisariaqarparput upperalugillu. Nammineq suliarigamikku qanoq upalungaarsimaneq issanersoq, taakkua suliassaminnik piareersaqqissaarput, Peqqissutsimut Naalakkersusisoq oqarpoq.

Innuttaasut aaleqquteqartut

Naak Naalakkersuisup Ittoqqortoormiini innuttaasut toqqissisimaqqullugit peqqinnissaqarfik assigiinngitsunik suliaqarneraraluaraa, Ittoqqortoormiini Kommunalbestyrelsimut ilaasortap innuttaasut ernumasut oqarpoq.

- Nakorsaqannginnitsinni arlaatigut ajutoortoqassagaluarpat, maanimi innuttaasoqaratta aamma suliaritereernikunik taavalu atortoqartunik nakorsaqarnatalu arlaatigut ajutoornermik kinguneqarsinnaasumik, taama oqarpoq Ittoqqortoormiini Kommunalbestyrelsimut ilaasortaq Rolf Piké.

Nunatsinni nakorsaqarniarneq pillugu naalakkersuisunit tamanit ilisimaneqartariaqartut aallaavigalugit Naalakkersuisut juuni naanerani ataatsimiissutigissagaat, Peqqissutsimut, Isumaginninnermut Inatsisinullu atuutitsinermut Naalakkersuisoq Martha Abelsen oqarpoq.