Partiit nassuertut: Peqqinnissaqarfipput ilungersunartorsioqaaq

Peqqinnissaqarfipput Danmarkimilu kalaaleqatitta meerartaanni angerlarsimaffiup avataanut inissinneqarsimasut Folketingimut qinigassanngortittut oqallisigisaannut ilaapput.
Folketingimut qinigassanngortittut KNR-ip unnukkut qineqqusaartitsinerani. Assiliisoq: Johannes Olsen. Assi © : KNR
Folketingimut qinigassanngortittoq maannalu folketingimut ilaasortaasoq, Siumumeersoq, Aki-Matilda Høegh-Dam. Assi © : KNR
Demokraatinit folketingimut qinigassanngortittoq, Anna Wangenheim. Assi © : KNR
Tillie Martinussen folketingimut qinersinissamut attaviitsutut qineqqusaarpoq. Assi © : KNR
Folketingimut qinigassanngortittoq maannalu folketingimut ilaasortaasoq, Inuit Ataqatigiinneersoq, Aaja Chemnitz. Assi © : KNR
Naleqqamit folketingimut qinigassanngortittoq, Kiista Fencker. Assi © : KNR
Allattoq Ann-Sophie Greve Møller
oktobarip 21-at 2022 08:58
Nutserisoq Hanne Petersen

Politikerertavut Folketingimut novembarip aallaqqaataani qinersinissamut tunngatillugu ulapputileruttorput, tamatumanilu ingammik peqqinnissaqarfiup ilungersunartorsiornera oqallisigeqaat.
Peqqinnissaqarfiummi ilungersunartorsioqisoq, partiit tamarmik isumaqataaffigaat. Tamanna TV-kkut ippassaq pingasunngornermi oqallinnermi KNR-imit aallakaatinneqartumi erserpoq.

Taamaammat Peqqinnissaqarfik Danmarkimit ukiut 30-t matuma siorna oqartussaaffigineqarunnaarluni nunatsinnit akisussaaffigineqalertoq Danmarkip oqartussaaffigileqqittariaqaraa, Atassut isumaqarpoq. Peqqinnissarfiup sulisussaalatsinera isumalluutissaalatsineralu assersuutigalugu nunaqarfinni uummammik aallartisaateqannginnera tamatumani tunngavilersuutigaat.

- Peqqinnissaqarfipput ilungersunartorsioqaaq. Peqqinnissaqarfik pillugu politikkikkut suliassat kisitta nammassinnaanngilagut, tamakkulu piinnarlugit inunnik annaasaqaqqittariaqanngilagut, Folketingimut qinigassanngortittoq Atassummeersoq Arnánguak’ Jeremiassen oqarpoq.

AAMMA ATUARUK Naleraq: Danmarkimit peqqinnissaqarnermut ikiorneqartariaqarpugut

Taamaattoqassappalli tamanna ajornartorsiutinik aaqqiinerunavianngitsoq, Folketingimi maanna ilaasortaq Siumumeersoq Aki-Matilda Høegh-Dam oqarpoq.

Fotograf:
Assi © : KNR

- Peqqinnissaqarfik Danmarkimut utertikkaluarutsigu kikkut salliunneqalerumaarnersut aperivoq nangillunilu:

- Tunulliunneqartarnerpummi tusarnartaanngilaq.

Ilisimasaqarneq aqqutissaasoq

Inuit Ataqatigiit Peqqinnissaqarfimmik tunulliussinermikkut ilaginnaasimasut, Folketingimut qinigassanngortittoq Demokraatineersoq Anna Wangenheim isumaqarpoq. 

Peqqinnissaqarfilli nunanit allaneersunik sulisoqarnerunikkut pitsanngorsarneqarsinnaasoq,  taanna isumaqarpoq.

- Danskit peqqinnissaqarfiat aamma sulisussaalatseqaaq, taamaammat suliassaqaqaagut. Peqqinissaqarfitsinni sulisooreersut attasulisoriinnarniarutsigit pikkorissartinnerullugillu ilisimsaqarnerulersittariaqarpavut, Anna Wangenheim oqarpoq.

Folketingip tamatumani iliuuseqarsinnaanera killeqartoq, Folketingimut qinigassanngorteqqittoq Folketingimilu maanna ilaasortaq IA-meersoq Aaja Chemnitz oqarpoq.

AAMMA ATUARUK Mød Grønlands kandidater til Folketinget

Danmarkimulli katsorsartikkiartortut ikiorneqarsinnaapput, IA-llu oqarnera naapertorlugu kræftimik nappaatilinnut immikkut aningaasaliinikkut kalaallinullu nutaamik Jyllandimi peqqissaavissaaliornikkut tamanna taamaaliortoqarsinnaavoq.

- Tamatuma saniatigut kalaallit nakorsanngorniat ilinniareernerminni nunatsinnut uterlutik suliartortarnissaasa qulakkeernissaanut qanoq iliorsinnaanersugut paasiniarlugu Folketingimut qaasartittarnissaat pingaaruteqarpoq. Kalaallimmi Danmarkimi ilinniartut 53 procentiisa missaannaat ilinniareernerminni nunatsinnut uterusuttartut ernumanartoqartippara, Aaja Chemnitz oqarpoq.

Kulturikkut assigiinngissuteqarneq aamma oqallisigigaat

Danmarkimilu kalaaleqatitta meerartaannik angerlarsimaffiup avataanut inissiisoqartarnera qinersinissamut oqallisigineqartunut aamma ilaapput. 

Assi © : KNR

Danmarkimimi meeqqat kalaallinit kingoqisuusut 5,6 procentii angerlarsimaffiup avataanut inissinneqarsimasuusut, ukioq manna siusinnerusukkut erserpoq. Danmarkimilu meeqqat danskinit kingoqqisuusut taamaallaat 1 procentii angerlarsimaffiup avataanut inissinneqarsimasuupput. 

Peqatigiiffiillu kalaallinik sullitallit aningaasaliiffigineqartalernissaat qulakkeerneqassasoq, partiit aamma isumaqataaffigaat.

- Kulturikkut paaseqatigiinnissamik oqalitseqartarnissaanillu qulakkeerinissarput pingaarutuuvoq, attaviitsutut Folketingimut qinigassanngortittoq Tillie Martinussen oqarpoq.

Kalaallit pisinnatitaaffeqarnerat taamaalilluni ersissammat kalaallisut kinaassuseqarnerup oqaluuserinissaa pingaartuusoq, Folketingimut qinigassanngortittut ilaat Naleqqameersoq Kirstern Fencker isumaqarpoq.

- Tamanna Danmarkimi kalaallini inuuniarnikkut ajornartorsiutilit sullinneqartarnerannut sunniuteqarsinnaavoq, taanna oqarpoq.

 

Nunatta karsiata peqqinnissaqarfimmut aningaasartuutai

  • Namminersorlutik Oqartussat peqqinnissaqarfimmut tamarmi 1,5 milliardit koruuninik 2022-mi aningaasartuuteqarnissaat naatsorsuutaavoq.
  • Taakkunannga 163 millionit koruunit kalaallinut innuttaasunut Danmarkimiittunut timikkut tarnikkullu katsorsaanermut atorneqartussaapput.
  • Kalaallit Peqqissartut Illuat Københavnimiittoq ukioq manna 34,3 millionit koruuninik missingersuuteqarpoq.

Paasissutissarsiffik: Naalakkersuisut Aningaasanut inatsisissatut siunnersuutaat 2023

Aamma atuaruk