Atuarfik Inussuup ammarneqarnissaanut nutaamik ulluliisoqartoq
Atuarfik Inussuk pillugu maanna nutaarsiassaqarpoq.
Atuarfik atuartunut 2024-mi aasaanerani atuanngiffeqareernerup kingorna piareeqqasussaagaluarpoq.
Ukiulli atuarfiusut aappaata affaa qaangiuttoq, sanasut eqqaassanngikkaanni, illorsuaq inoqanngivippoq.
Ikuallattoqartillugu aaqqiissutit isumannaallisaanermut ajoqutaasimasinnaanerat, KNR-imit siorna nutaarsiassiissutigineqarpoq. Cowimit nalunaarusiami tamanna allaaserineqarpoq.
Aammattaaq 2022-mi nalunaarusianit paasissutissat naapertorlugit illup qerisimanera, isugutsersimanera sanaartornerlunnermillu eqqugaanera, KNR-ip oqaluttuaraa.
Sanaartornermut aningaasartuutit katillugit 633.739.112 koruuniusut, Sermitsiamit siorna septembarip qulingiluaanni allaaserineqarpoq.
Tusagassiuutip naatsorsuinera naapertorlugu ullormut akiligassiissutit 39 millionit koruunit taamanikkut pallippaat. Sanaartornerup nalingata 10 procentia ullormut akiligassiissutinut killigitinneqarput.
Sanasut ikuallattoqarnissaanut sillimaniarnermi ajornartorsiutaasumut aaqqiissutissatut ikuallattoqarnerani qamiterutinik qilaaniittartunik pilersitsinissaq suliarileruttorpaat.
Ammarnissaanut ulloq saqqummiunneqartoq
Kommuneqarfik Sermersuup sanaartugassanik suliassinneqartartoq Istak siorna oktobarimi isumaqatigiissuteqarfigaa.
Atuarfik Inussuk 2026-mi aggustimi ammassasoq naatsorsuutigineqartoq tassani nalunaarutigineqarpoq.
Kommuneqarfik Sermersuup atuarfiup atuartunut ukioq manna aggustip aallaqqaataanni ammarnissaa tusagassiuutinut nalunaarummi oqaatigaa.
Kommunimi Sanarfinermut Avatangiisinullu Ingerlatsivimmi pisortap, Søren Sohn Krog Pedersenip atuartut isumannaatsumik atuartinneqalernissaat naatsorsuutigigitsik oqaatigaa.
- Atuarfimmi nutaarluinnarmi isumannaatsuusumilu atuartut tikilluaqqujumaarivut naatsorsuutigilluinnarparput. Pilersaarutit malillugit sanaartorneq ingerlanneqarpoq, aamma ukioq manna aggustip aallaqqaataani atuarfiup ammarnissaanut piareereersimassasoq naatsorsuutigaarput.
Atuarfiit oquttut
Atuarfiit USK-ip aamma ASK-ip oqunnerat pissutigalugu ukiaq qaammammik ataatsimik nikingallutik matuneqarput.
Taamaammat atuartut 1000-it missaanniittut illoqarfimmi sumiiffinni assiginngitsuni atuartinneqartariaqarput.
Tamanna pillugu Siumup najukkami suliffeqarfiit allaffinnik sutortarfinnillu atuartitsiffiusinnaasunik atugassiisinnaanissaannik kaammattuuteqarfigai.
Riikke Grønvold Kommuneqarfik Sermersuumi atuarfeqarnermut immikkoortortami pisortaavoq, taassuma atuartut atuarfimminni nutaani eqqissimanerusumik inissisimalersimasut tusagassiuutinut nalunaarumminni kingullerni oqaatigaa.
- Naak suli naammassinngikkaluarluta, ukiarmut sanilliullugu maanna allaanerujussuarmik inissisimavugut. Ullut ataqatigiissumik ingerlanneqaqqilerput, matumani angajoqqaat pikkorissut aamma paasinnillutillu suleqatiginnikkusuttut pissutaapput, Riikki Grønvold tusagassiuutinut nalunaarummi oqarpoq.
