Kommune nunatsinni meeqqat atuarfiata anginerpaat sanaartorneranik iluatsitsiniarluni milliardinik atussasoq
Sanaartorneq 700 millionit koruuninik naleqarpoq, nunatsinnilu meeqqat atuarfianni anginerpaalertussaavoq.
Maannali sanaartornermi assallaanerup siulliup kingorna ukiut marluk sinnerlugit qaangiuttut suliniut ajornartorsiulerpoq.
Tassami Nuuk City Development kommunip illoqarfiup ineriartortinneqarnissaanut ingerlatseqatigiiffittut suliniummut akisussaasuusimasoq akiliisinnaassuseqarnermik ajornartuungaatsialerpoq.
Akiliisinnaassuseqarnermik ajornartoorneq ingerlatseqatigiiffiup ulluinnarni NCD-mik taaneqartartup akiliisinnaajunnaarneranik kinguneqarsinnaavoq.
Taamaattumik Kommuneqarfik Sermersuumi kommunalbestyrelsimi amerlanerussuteqartut NCD-p Nuummi sanaartorneri suliffeqarfiutaalu kommunimit maanna tiguneqassasut aalajangerpaat. Taakku atuarferujussuarmik, ulluunerani paaqqutarinniffinnik arfinilinnik qatserisarfimmillu sanaartornermik ilaqarput.
Taakku aningaasanik akeqarput. Taamaattumik kommunip pilersaarutini piviusunngortissinnaaniarlugu 1,2 milliardit koruuninik atornissaa Naalakkersuisunit akuerineqassaaq.
- Naalakkersuisoq aalajangiinermi tassani akuersissuteqaqqaartussaavoq, Kommuneqarfik Sermersuumi pisortaaneq, Ole Jacobsen oqarpoq.
Ingerlatseqatigiiffik akiliisinnaassuseerukkiartortoq
Naatsumik oqaatigalugu NCD-p akiliisinnaassuseerunnissaanut piffissaq apeqqutaaginnaleqqavoq. Tamanna ingerlatseqatigiiffiup aningaasaliiffigineqarnissaanik amigaateqarnermik pissuteqarpoq.
Nuuk City Development pillugu
Nuummi illoqarfiup piffissami sivisuumi ineriartortinneqarnissaa pissutigalugu ukiut tallimat matuma siorna pilersinneqarpoq.
NCD-p inissianik, illunik aningaasaliiffissatullu suliniutinik ineriartortitsinissaq, sanaartornissaq ingerlatsinissarlu siunertarai. Nuummi atuarfimmik, ulluunerani paaqqinniffinnik qatserisarfimmillu nutamik pilersitsinissaq suliassanut ilaatigut ilaapput. Tamatuma saniatigut NCD illoqarfiup ilaanut Siorarsiorfimmut pilersaarummik ingerlatsinissaq pissutigalugit pilersinneqarpoq.
NCD-lli siulersuisuisa pisortaaneq pisortallu tulliata suleqatiginerat unitsinneqartoq maajip ulluisa aqqaneq-aappaanni nalunaarutigaat.
NCD-p kommunip inissiaatileqatigiiffianut Iserimut kattunneqarnissaa borgmesterip tamatuma kingorna siunnersuutigaa. Kommunip NCD-p atuarfimmik sanaartornermik ulluuneranilu paaqqinniffiit pillugit suliassat nammineq aamma tigussavai.
Borgmesterimit siunnersuut kukkunersiuisut kommunip inissiaqarnermut atatillugu suliaqarneranik allaffissorneranillu nalunaarusiaata saqqummersinneqarnerata nalaani siunnersuutigineqarpoq, nalunaarusiami NCD aamma isornartorsiorneqarpoq.
Nalunaarusiami ulluunerani neqeroorutinik atulereersunik suliniutinillu piviusunngortinneqangajalersunik attartornissamik isumaqatigiissuteqartoqarsimaneranut takussutissaqanngitsoq nalunaarusiami erserpoq. Matumani Nuummi atuarfiup nutaap sanaartornera ilaatigut pineqarpoq. Tassunga aningaasaliinerit sanaartortoqaleruttornerani aamma inissinneqarsimanngillat.
Kommunimi pisortaaneq Ole Jacobsen nassuiaavoq.
- Tassa imaappoq sanaartortitsinerminut aningaasaliisinnaassanngilaq. Taamaammat qaqugu akiliisinnaassuseerunnissaa apeqqutaaginnalerpoq, taanna oqarpoq.
AAMMA ATUARUK Borgmesteri: Nuuk City Developmentip ilarujussua atorunnaarsinneqarpoq
Tamanna ukiup naanerani pilereersinnaasoq kommunilu ingerlatseqatigiiffimmut aningaasaliinerunngikkuni tamanna akiliisinnaajunnaarnermik kinguneqassasoq kommunimit missiliutigineqartoq, Ole Jacobsen nassuiaavoq.
Kommunimi pisortaanerup oqarnera naapertorlugu Nuummi atuarfiup sanaartorneranik suliaqarnerup unittoornissaanut akissaqartoqanngilaq. Taamaattumik kommunip nunatsinni atuarfiit annersaata aningaasaliiffigineqarnissaa qulakkeerniarlugu nangitsisariaqarpoq.
- Sanaartorneq ima angitigisoq unittoortinneqarsinnaanngilaq. Tamanna illuatungeriinnut tamanut tassa sanasut suliffeqarfiannut sanaartortitseqatigiiffinnut naggataanilu kommunimut akisuallaarujussuarpoq, taanna oqarpoq.
Politikerit: Maanna aqutsisoqalissaaq
Kommunip NCD-p sanaartorneranik suliffeqarfiutaanillu nangitsikkuni susoqarnissaa Siumumit qularutigineqanngilaq.
- NCD-mik tamakkiisumik piginnittuuvugut, taamaammat akiligassarsititsisartut kasuttussagaluarunik soorunami uagut matutsinnut kasuttussapput. Ulluunerani paaqqinniffinnik imaluunniit atuarfimmik attartorniartut kommune eqqaassanngikkaanni amerlavallaanngillat, taamaammat kommune soorunami naggaterpiaani akiliisussanngussaaq. Maanna taamaaliorpugut, Siumumit, Inga Dora Markussen oqarpoq.
Demokraatinit kommunalbestyrelsimut ilaasortap, Poul Petersenip kommunip anguniakkaminik angusaqarnissaanut pissutsinillu aqutsisinnaalernissaanut maanna qulakkeerisariaqarnerarpaa.
- Annaassiniarnermik pilersaarummik taaneqarsinnaavoq, kisianni pissutsinik ingerlatitseqqinnissamit allatut iliorsinnaanngilagut, soorunami qulakkeerneqassaaq, Poul Petersen oqarpoq.
- Sanaartortoqarpoq. Taakkulu naammassineqassapput, taanna oqarpoq.
Kattussinerup NCD matugaa
NCD-p inissiaatai 1000-it missaanniittut kommunip inissiaatileqatigiiffianut Iserimut kattussinikkut nuutsinneqassasut amerlanerussuteqartut ataasinngornermi ataatsimiinnermi aalajangerpaat.
Taamaalilluni NCD ingerlatseqatigiiffittut atorunnaassaaq.
Kattussinissaq partiinit tamanit Siumut minillugu taperserneqarpoq. Siumup NCD-p Iserimmut kattunnissaata kingunissai erseqqissumik paasissutissiissutigineqannginngeri innersuussutigigai, Inga Dora Markussenip ilaatigut oqaatigaa.
Demokraatinit allaanerusumik oqartoqarpoq:
NCD-p siunertaanik misissuilluta naliliinitsinni siunertaa tassaniikkunnaarmat kattussinissaq periarfissatuaasutut takuarput, Poul Petersen oqarpoq.