Frankrig nunarpullu aatsitassanut suliassaqarfimmi isumaqatigiissuteqartut
Nunarsuarmi aatsitassat pillugu nittarsaassinerit annersaannit, Torontomi sapaatip akunnerani matumani aaqqissuunneqartumit nutaarsiassaqaqqippoq.
Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisup, Naaja H. Nathanielsenip aatsitassanut nukissiuutinullu ilisimasanik Canadalu avitseqatigiinnissamut isumaqatigiissut ataasinngormat atsiorpaa.
Canadamut siunertaqartumik isumaqatigiissut Greenland Resourcesip, nunatta avannaani kangiani Malmbjergimi molybdæninik piiaanissamut pilersaarutaanut piumasaqaatitaqartumik 33 millionit koruuninik atukkiinissamut isumaqatigiissut ataasinngormat aamma atsiorneqarpoq.
Naalakkersuisut marlunngornermi allamik aamma isumaqatigiissuteqarlutik maanna tusagassiuutinut nalunaaruteqaqqipput, tamatumuuna Frankrig isumaqatigiissuteqarfigineqarpoq.
Franskillu Nunap Sannaanik Misissuisarfia, BRGM teknikkikkut suleqatigiinnissamut uani isumaqatigiissuteqarfigaat.
Franskit qaammataasaanit sineriak assiliortorneqassasoq
Naatsumik oqaatigalugu sumiiffiit sikusanngitsut franskit qaammataasaanit uuttortaaqataaffigineqassapput.
Tamanna nunap sannaani sunik toqqorsimasoqarneranik pitsaanerusumik paasisaqarnissamut ilapittuutaassaaq.
- Suliniut taanna nunatta sannaa pillugu nutaanik itinerusunillu ilisimasaqalersitsissaaq tamannalu franskit ikiuunneratigut taamaallaat periarfissaavoq. Suliniutit allat kingusinnerusukkut malittaatinneqassapput, taakkunani aamma Kalaallit Nunaat pillugu nunap sannaanut paasissutissat katersorneqarnissaat ukkatarineqassalluni, tusagassiuutinut nalunaarummi allassimavoq.
Nunap sannaa pillugu paasissutissat nutaat misissuisoqarnissamut atatillugu soqutiginninnerulersitsissasut naatsorsuutigineqarpoq.
Frankrigimut aatsitassanut atatillugu siunissami isumaqatigiissuteqarnissaq
Naaja Nathanielsenip isumaqatigiissut franskit præsidentiata, Emmanuel Macronip siorna aasaanerani tikeraarneranit toqqaannartumik aallaaveqarnerarpaa.
- Isumaqatigiissut Kalaallit Nunaata aamma Frankrigip akornanni suleqatigiinnerulernerup, franskit præsidentiata Emmanuel Macronip 2025-mi aasaanerani tikeraarnerata kingorna aallartinneqartup, toqqaannartumik malitsigaa.
Naalakkersuisup suleqatigiinnissamut isumaqatigiissutip nutaap nuannaarutigineqarnerata saniatigut Frankrigimut aatsitassarsiornissamut atatillugu suleqatigiinnissamut isumaqatigiissusiornissaq sulissutigineqartoq aamma saqqummiuppaa.
- Franskit ikiuunnerat aammalu franskit suleqataarusussuseqarluarnerat suliap ingerlanera tamaat takusarput Naalakkersuisut qujamasuutigaat, aammalu Naalakkersuisut aamma franskit naalakkersuisuisa akornanni aatsitassanut suliassaqarfimmi MoU-imik suliaqarnissaq qilanaaralugu.
