Arctic Winter Games sapaatiuppat ammaanersiorneqassaaq
Nunatsinniit peqataajartortut katillugit 100-t missaanniissasut, Timersoqatigiit kattuffianni pisortaq, Jonas Jensen oqarpoq.
Arctic Winter Games inunnit 2.000-it missaanniittunit peqataaffigineqartarpoq.
Allattoq Steve Pedersen Hinrup
marsip 05-at 2026 14:04
Issittormiut Unammiuaartarnerat - Arctic Winter Games Canadami Yukonip illoqarfiata pingaarnersaani Whitehorsemi ukioq manna ingerlanneqassaaq.
Nunatsinnit peqataasussat pilersaarutit malillugit Nuumminngaanniit arfininngornermi ullaakkut nalunaaqutaq 10:00 aallassapput.
Nunatsinnit 100-t missaanniittut peqataassasut, Timersoqatigiit Kattuffianni pisortap, Jonas Jensenip oqaatigaa:
- Kalaallit timersortartut sungiusaasullu 75-it missaanniipput. Taassuma saniatigut ulluinnarni aqutsisussat, ikiuuttussat immikkullu qaaqqusat ilanngukkaanni 100-t missaanniipput, Jonas Jensen oqarpoq.
Peqataasartunit pissanngatigineqartut ilaat tassa ammaanersiorneq aqagu sapaammi ingerlanneqassaaq, unamminerillu kingulliit marsip 14-ianni ingerlanneqassallutik.
Nunatsinniillu timersuutit peqataaffigineqartut tallimaasut Jonas Jensen oqarpoq
- Timersuutit tallimat peqataaffigissavagut. Arctic Sports, Dene Games, sulorarneq, nerrivimmi arsaararneq aamma snowboarderneq. Aamma kulturilerimik takutitsisartut peqataassapput, aamma inuusuttut namminneq kajumissutsimik suliaqarlutik peqataasartut, Jonas Jensen oqarpoq.
Angusaqarluarnissaat naatsorsuutigineqarpoq
Naallu inuit 2.000-it katillugit Arctic Winter Games peqataaffigisaraluaraat, kalaallit angusaqarluarnissaat Timersoqatigiit kattuffianni pisortap neriulluarfiginerarpaa:
- Kalaallit Arctic Winter Gamesimi peqataasartut naliginnaasumik takutitsilluartorujussuusarput, aamma pitsaassutsikkut qaffasissumi inissisimasarput. Taamaattumik naatsorsuutigaarput ukiut siuliinitulli angusarissaarlutik aamma pitsaanerpaat akornanni inissikkumaartut, Jonas Jensen naggasiivoq.
AWG naammassineqareerpat nunatsinnit peqataasut Nuummut marsip 16-ianni ullaakkut arfernup-qeqqata missaani tikinnissaat naatsorsuutaavoq.
Nunatta Whitehorsellu nalunaaqutaa naapertorlugu akunnerni tallimani kingusinneruvoq.
KNR radiokkut Finn Nielsen Noah Mølgaardilu ullut tamaasa nalunaaqutaq 17.30-mit akunnerup affaata missaani aallakaatitsisassapput. KNR-ip livebloggiatigut aamma malinnaasinnaavutit.
