Parisimut isumaqatigiissut pillugu oqallinneq sivitsoqqittoq
Parisimi isumaqatigiissut Inatsisartut upernaakkut ataatsimiinnerani aatsaat siullerpaamik oqaluuserineqanngilaq.
Aamma aappassaaniiunngilaq. Immikkoortormi qinikkat akornanni pingajussaanik oqaluuserineqarpoq, taamaakkaluartorli nunarput Parisimi isumaqatigiissummut nunarsuup kissatsikkiartorneranik annikillisaaniarnissamut siunertaqartumut ilanngutissanersoq suli isumaqatigiissutigineqanngilaq.
Nunalerinermut, imminut pilersornermut, nukissiuutinut avatangiisinullu Naalakkersuisup, Kalistat Lundip (IA) nunatta Parisimi isumaqatigiissummut ilanngunnissaanut aalajangiiffigisassatut siunnersuut Naalakkersuisut siunnerlugit apriilip aallartinnerani nassiuppaa.
- Nunarsuarmioqataasutut isumaqarpugut silaannaap allanngoriartornera inuit piliarigaat, taamaammallu aaqqiisussat tassaappput nunarsuup innuttaasui. Maannakkut nunarsuarmi nunat allat pingasut-sisamat assigalugit kisiartanngulerpugut (isumaqatigiissummut, aaqq.) peqataanngitsut, Kalistat Lund taamani oqarpoq.
Inuit Ataqatigiilli Naleraq taarserlugu Siumut ukiut ataatsip matuma siorna Naalakkersuisoqataalersimmagu pilersaarut taanna piviusunngunngilaq.
Siumut Parisimi isumaqatigiissummut akuersiva – imaluunniit?
Nunattami isumaqatigiissummut ilaalernissaa Siumup akerleraa. Maannalu qulartoqarpoq:
- Isumaqatigiissummut ilaalernermi kingunerluutaasinnaasut pillugit ilisimasat Siumumit suli naammanngissoraagut. Siumumit, Mala Høy Kúko ullumi oqarpoq:
- Qularisaqarnikuuvugut, sulilu qularisaqarluta. Paasissutissagut naammalersinnagit aalajangiissanngilagut. Naalakkersuisut suliaat ataqqivarput, kisianni isumaqatigiissummut atsiornissatsinnik aalajanginnginnitsinni paasissutissat amerlanerussapput, taanna oqarpoq.
IA-mit Mariane Paviasen ataatsimiinnermi ullumi ima oqarpoq:
- Uagut suliarerusupparput inuusuttortatta meerartattalu piumasaaat, nunarsuarput aseroriartuinnartoq iluarsaasseqataaffigissallugu uagut piareersimavugut.
Suliffissuaqarnermut aporfissaqanngitsoq
Demokraatinit, Nivi Olsenip oqarnera naapertorlugu isumaqatigiissut nunatta suliffissuaqarnikkut ineriartorneranut aporfissaqarpasinngilaq, taamaammat partii tapersiivoq.
Tamanna nunat ataasiakkaat Parisimi isumaqatigiissummut ilaasut nunaminni CO2-mik aniatitsinermut atatillugu nammineq anguniagassiortarnerat pissutaavoq.
- Pilersaarusiornermut nalunaarummut ilanngunnissaq isumatsialaavoq – aamma silap pissusiata allanngoriartorneranut unammilleqataanitsinnik tamanna nunarsuup sinneranut takutitsinerussaaq, Nivi Olsen oqarpoq.
Atassutip Parisimi isumaqatigiissummut ilanngunnissarput aamma isumaqatigaa, kisianni – Siumutulli – kingunerluutaasinnaasut ernumassutigalugit.
Siunnersuutip suliareqqitassanngortinneqarnissaa partiit isumaqatigiissutigaat, taannalu Eqqissisimatitsinermut Avatangiisinullu ataatsimiititaliamit suliarineqassaoq innersuussutaalluni.
