Naalakkersuisut Parisimi isumaqatigiissut pillugu akunnattoortut

Politikerit nunarsuarmi tamaneersut inuussutissarsiornermillu sulialippassuit Naalagaaffiit Peqatigiit aaqqissugaannik COP26-mik taasamik silap pissusia pillugu ataatsimeersuartoqarnerani Kalaallit Nunaat aamma peqataassaaq.

Naalakkersuisuniit peqataasut nunarsuarmioqatitsinnut oqaluttuarinialersaarpaat nunatsinni mingutsitsinngitsumik qanoq ineriartortitsisoqarniarnersoq.

Nukissiutinut Avatangiisinullu Naalakkersuisoq Kalistat Lund (IA) sumik saqqummiussaqarnissartik pillugu ima oqarpoq.

- Nunatta ineriartorfiunissaa sukkut uagut periarfissaqartutut isigineripput, taanna oqaluttuarisussaavarput, Kalistat Lund oqarpoq.

Taassuma Naalakkersuisut siulittaasuat Múte Bourup Egede angalaqatigaa Naalagaaffiillu Peqatigiit aaqqissugaannik silap pissusia pillugu ataatsimeersuarnerit 26-issaannik ingerlanneqartussamut COP26-mik taasamut Skotlandillu illoqarfiisa pingaarnersaanni Glasgowimi pisussami peqataassapput.

Ataatsimeersuarneq sapaatiuppat aallartissaaq novembarillu aqqaneq-aappaata tungaanut ingerlasussaalluni, Kalistat Lundilu isumalluarpoq.

AAMMA ATUARUK IA silap pissusaata allanngoriartornera pillugu qineqqusaaruteqartoq: Nunarput Parisimi isumaqatigiissummut ilanngussaaq

2015-mi Parisimi isumaqatigiissut nunarpassuarnit isumaqatigiissutigalugu atsioqatigiissutigineqarpoq. Isumaqatigiissutaavorlu nunani tamaalaani CO2-mik mingutsitsineq appartikkiartuaartinneqassasoq, nunallu tamarmik appartikkiartuaartitsinerminnik ataavartumik takutitsiuartartussaapput.

Taamanikkut Kalaallit Nunaata isumaqatigiissut akuerinngilaa. Taamanilu Naalakkersuisuusup Vittus Qujaukitsup tunngavilersuutigaa, taamaaliorneq nunatta aningaasarsiorneranut killiliisussaasoq

Qineqqusaarnerulli nalaani IA-meersup Múte Bourup Egedep isumaqatigiissummut peqataarusunninni erseqqissaatigaa.

KNR-ip Naalakkersuisut siulittaasuat Múte Bourup Egede attaviginiaraluarpaa aperiniarlugu naalakkersuisoqatigiit suli tamatuminnga siunertaqarnersut.

Parisimut isumaqatigiissummut nunatta ilaaqqinniarnera nunatsinnut akunnattoorutaasinnaasoq, Ilisimatusarfimmi Inuiaqatigiilerinermi aningaasarsiornermullu tunngasunut lektori, Javier Arnault isumaqarpoq.

- Kalaallit Nunaanni suliffissualiornerit ineriartortillugit maanna aallartereerput. Kalaallit Nunaallu isumaqatigiissummut unioqqutinneqartussaanngitsumut pisussaaffeqarniarsarissaguni, suliffissualiornerit unikaallatsittariaqassapput mingutsitsisoqannginnissaanut appasinnerpaaffigeqqusaasoq angussaguniuk, taanna oqarpoq.

Taassumalu erseqqissaatigaa tamanna nunap aningaasarsiorniarneranut aamma sunniuteqanngitsoornavianngitsoq, imalu nangippoq:

- Tamanna Parisimi isumaqatigiissummut tunngatillugu ajortumik kinguneqarsinnaavoq, tassami Kalaallit Nunaat nalorninartumut taava inississaaq imminut pilersornissamut aningaasanik isaatitsiniarsariitigaluni saniatigullu Parisimut isumaqatigiissut naapertorlugu pinngortitamut mingutsitsinaveersaarniaqalunilu pilertussaassaaq.

Javier Arnault naapertorlugu tamanna naalakkersuisut pilersaarusiornerlunneraat, Parisimimi isumaqatigiissummut erseqqissuliortoqarsimanngimmat.

- Kalaallit Nunaata suliffissualiariniagai pinngitsooratik mingutitsisussaapput, Kalaallit Nunaallu pisortatigoortumik Parisimi isumaqatigiissummut ilaaqqukkuni taava aamma mingutitsinaveersaartariaqassagaluarpoq, taamaalippat taava Kalaallit Nunaat nunarsuarmi mingutsitseqataasutut nunarsuarmi oqaluuserisassatut allattorsimasuutigineqalissaaq, tamannalu Kalaallit Nunaata ineriartorneranut aamma killiliisussanngussaaq.

Javier Arnault taama oqarpoq.

Ataatsimeersuarnik sapaatiuppat aallartissaaq novembarillu aqqaneq-aappaata tungaanut ingerlasussaalluni.