USA-p Kalaallit Nunaannut immikkut aallartitaata, Jeff Landryp, naalakkersuisut siulittaasuata Jens-Frederik Nielsenip (D) umiarsuaq napparsimmavik USA-mit nunatsinnukartinniarneqarnera akuerinngimmagu, tamanna kamaatigaa.

- Ministeriuneq Jens-Frederik Nielsen (nunatta siuttua aaqq.) kanngusunniarit. Præsident Trump USA-lu ernumapput, Jeff Landry inoqatinut attaveqaatikkut X-imi takisuumik allappoq.

Donald Trump inoqatinut attaveqatigiittarfimmi Truth Social-imi, sapaatip unnuaani allappoq, Amerikamiut umiarsuaat napparsimmaviusoq inuppassuarnik napparsimasunik isumaginnittussaq Kalaallit Nunaannut ingerlaartoq.

Donald Trumpip umiarsuaq napparsimmaviusoq USNS Mercy-mik atilimmik Amerikamiut erfalasuannik erfalasulik AI-mit titartagaq, allataminut assitaliussimavaa.

Kalaallit Nunaatali Amerikamiut umiarsuaat napparsimmaviusumik tikittoqarnissaa akuerinngilaa. Jens-Frederik Nielsen Facebookimi sapaatiummat taama allappoq.

- Maanngaanniit qujaannarpugut. Præsident Trumpip Amerikarmiut umiarsuaat napparsimmavik Kalaallit Nunaannukaanniaaraa paasivarput. Nunatsinnili akeqanngitsumik tamanit atorneqarsinnaasumik peqqinnissaqarfeqarpugut.

- USA-mi taamaattoqanngilaq, nakorsiarnissarmi akisoorujussuummat, Jens-Frederik Nielsen allappoq.

Tunngaviusumik pisariaqartitat amigaatigineqartut

"Kalaallit Nunaat peqqissoq USA-p nunatut isumannaatsuunissaanut pingaaruteqarluinnarpoq", Jeff Landry allappoq.

Taassumap nunatsinni peqqinnissaqarfik pissusissamisut ingerlasorinngilaa.  

- Kalaalerpassuit ulluinnarni ajornartorsiutaat pillugit oqaloqatigereerlugit, sammisaq ataaseq immikkuullarippoq - peqqinnissaqarfik. Nunaqarfippassuit illoqarfiillu minnerit tunngaviusumik pisariaqartitarineqartunik amigaateqarput, pisariaqartitat Amerikamiunit taamaattussaannartut arlalitsigut isigineqartunik.

- Innuttaasukitsut aalajangersimasunik nakorsaqanngillat, napparsimasut nappaataannik paasiniaanermi atortussanik nakorsamulluunniit immikkut ilisimasalinnut katsorsartinnissaminnut periarfissaqanngillat, taamaattumik inuunerannut pingaarutilimmik katsorsartikkumallutik ungasissumut angalasariaqartarput, naak najugaqarfianni tamanna periarfissaasariaqaraluartoq, Landry allappoq.

Donald Trumpip USA-p Kalaallit Nunaannik tiguaanissaa arlaleriarluni piumasarisaraluarpaa, Danmarkimiilli nunatsinninngaanniillu itigartinneqartarluni. Præsidentip Kalaallit Nunaat USA-p isumannaatsuunissaanut pingaaruteqarsoraa.

Jeff Landryp Kalaallit Nunaannut marsimi tikeraarnissaminik pilersaarluni siusinnerusukkut oqaatigaa. Tamanna Fox Newsimit januaarimi apersorneqarnermini oqaatigaa.

/ritzau/