Paartiit ilaat 2018-imi qinersinnginnermi: Air Greenland nunatsinnit tamakkiisumik pigineqalernavianngilaq
Inuit Ataqatigiit Namminersorlutik Oqartussat Air Greenlandimik kisimiillutik piginnittunngornissaannik Inatsisartunut 2018-imi qineqqusaartoqarnerani siunnersuutaat, Siumup tapersersunngilaa.
- Maannakkut pisiarinissaanut oqalunneq piffissaanngilaq, Siumup taamanikkut siulittaasuata tullia Karl Kristian Kruse 2018-imi oqarpoq.
AAMMA ATUARUK Siumut Air Greenlandimut piginneqataassutsimik piserusunngitsoq
Air Greenlandimilli piginneqataasut iliuusaat tukattut, Inuit Ataqatigiit isumaqarput. Namminersorlutik Oqartussammi timmisartuutileqatigiiffimmi 37,5 procentinik, SAS aamma 37,5 procentinik danskillu naalagaaffiat 25 procentinik piginneqataassuteqarlutik tamarmik immikkut soqutigisatik aallukkumagaat, Inuit Atatigiit Isumaqarput.
Qinersinermi neriorsuutit: Paartiit ima oqarput - imalu pisoqarpoq
Inatsisartunut 2018-imi kingullermik qineqqusaarnermi neriorsuutit sorliit eqquutitinneqarpat, sorliillu eqquutitinneqanngillat?
KNR-ip 2021-imi apriilip ulluisa arfernanni qinersinissaq sioqqullugu tamakku qulaajarlugit allaatigisaqartassaaq.
- Air Greenlandip inuiaqatigiinnit tamakkiisumik pigisassanngortinneratigut pitsanngorsagassagut nammineq aalajangersarsinnaalissavavut, oqariartorfissat maannakkutut pingasuunatik ataasiinnanngussammata. Iluanaarutaasartut angallannermi pitsanngorsaanermut atorsinnaanngussavavut, sorusunnerluta allat apereqqaarnagit aalajangersaasinnaalissalluta, Aqqaluaq B. Egede IA-meersoq 2018-imi oqarpoq.
Erik Jensenili Siumumeersoq tamanna pillugu isummerusunngikkallarpoq. Air Greenlandimik tamakkiisumik piginnittunngorneq qanoq akeqassanersoq, taassuma paaseqqaarusuppaa.
Ukiup ataatsip kingorna tamakkiisumik piginnittunngortut
Namminersorlutik Oqartussalli Air Greenlandimi piginneqataassutitik tuneriarlugit aningaasat pissarsiatik piginneqatigiiffimmik nunatta tamakkiisumik pigisassaanik pilersitsinermut atussagaat, Partiit Naleraq isumaqarpoq.
Air Greenlandimmi atornera akisuvoq - piginnittut aamma nikikkaluarpataluunniit. Taamaammat piginneqatigiiffimmik nutaamik pilersitsisoqartariaqartoq, Partii Naleraq isumaqarpoq.
AAMMA ATUARUK Naleraq vil sælge det hele - Nunatta Qitornai vil købe en smule
Nunatta Qitornai partiini Namminersorlutik Oqartussat Air Greenlandip ilarujussuanik piginnittunngornissaannut siunnersuummut IA-p saniatigut tapersersuisutuaavoq.
- Piginneqataassutsit tamakkiisumik tigunngikkaluarlugit amerlanerpaalli pigilernerisigut aalajangiisinnaassuseqarluni piginnittutut inissinnissaq pingaarneruvoq, Vittus Qujaukitsoq 2018-imi qinersinnginnermi oqarpoq.
Air Greenlandili nunatsinnit tamakkiisumik pigineqalersinnaanersoq misissorneqartariaqartoq, Demokraatit isumaqarput.
AAMMA ATUARUK Air Greenlandip nunatsinnit tamakkiisumik pisiarineqarsinnaanini tapersersorpaa
Siumut qinersereernermi Naalakkersuisuni siuttuugaluarluni neriorsuutaa piviusunngunngilaq, Demokraatillu piumasaat aamma timitalerneqarani.
Namminersorlutik Oqartussammi Air Greenlandimik qinersinermiit ukiup ataatsip kingorna tamakkiisumik piginnittunngorput.
Danskit naalagaaffiata SAS-illu Air Greenlandimi piginneqataassutaat danskit taamanikkut ministeriunerata Løkkep tuniumareeraalu taamaattoqarpoq. Danskillu naalagaaffiat Kalaallit Airports International A/S-imi aamma piginneqataalerusulluni nalunaarpoq.
Danskit naalagaaffiata timmisartuutileqatigiiffimmi piginneqataassutini tunippagit 100 millionilikkuutaanik iluanaaruteqaatigissavaa. Aningaasat taakku Nuummi Ilulissanilu mittarfissualiornernut aningaasaliissutiginiarpaat.
2019-imilu taamaaliorpoq. Siumut siuttoralugu Naalakkersuisut tusagassiuutinut 2019-imi maajip ulluisa 29-anni taama nalunaarput:
- Air Greenlandip ataatsimoortumik pigineqarnera maannakkut kalaallit assaaniilermat Naalakkersuisut Demokraatillu naammagisimaartorujussuuaat.
Namminersorlutik Oqartussat SAS-ip danskillu naalagaaffiata Air Greenlandimi piginneqatigiissutaasa pisiarinerannut katillutik 461 millionit koruuninik akiliipput.
