Air Greenlandimi piginneqataassutsit isumaqatigiinngissutaasut
-Inuiaqatigiit tamakkiisumik pigisaannik timmisartuutileqatigiiffimmik naqqaninngaaniit pilersitsigaanni akikinnerujussuussasoq upperilluinnaqqissaarparput, Air Greenlandimi piginneqataassutsit sinnerisa pisiarineraniit naleqqiullugu, Partii Naleqqameersoq Per Rosing-Petersen taama oqarpoq.
Inuit Ataqatigiit siulittaasuata tullia Aqqaluaq B. Egede ippassaq oqarpoq, unammilleqatigiinnermi sakkortusiartuinnartussami nukittunerpaamik inissinnissaq anguniarlugu Air Greenlandimi piginneqataassutsit nunatta tamaasa pigilertariaqarai.
AAMMA ATUARUK Demokraterne vil undersøge privatisering af Air Greenland
Taamatuttaaq angallannikkut atukkat unamminartut aaqqiivigineqassappata takornariaqarnerlu ineriartortitsivigineqassappat oqartussaaffik annerpaaq pigilerneqartariaqarnerartut, oqariartortarfiillu maannakkutut pingasuujunnaarlutik ataasiinnanngortinneqartariaqartut.
AAMMA ATUARUK Air Greenland skal ejes helt af Grønland
Tamannali Nunatta Qitornaanit aamma ilalerneqanngilaq. Piginneqataassutsit tamakkiisumik tigunngikkaluarlugit amerlanerpaalli pigilernerisigut aalajangiisinnaassuseqarluni piginnittutut inissinnissaq pingaarnerusoq Nunatta Qitornai isumaqarput:
-SAS-ip Air Greenlandimi piginneqataassutaasa piaartumik pisiarinissaannut sulissutiginninnissaq alloriarnerit siullersarisariaqarpaat, Nunatta Qitornaani siulittaasoq Vittus Qujaukitsoq taama oqarpoq.
Namminersorlutik Oqartussat ingerlatseqatigiiffinni akuliusimanerat peqqissaartumik aamma nalilersugassaasoq erseqqissaatigaa.