Air Greenland billetsit akikitsut pillugit: Taamaammat angalanissaq allanngortinneqarsinnaavoq aningaasalluunniit utertinneqarsinnaallutik
Air Greenlandip akikitsunik taaneqartartunik billetsersiarisimasaminnik utertitsiniartut allanngortitsiniartulluunniit qanoq amerlatigissanersut tallimanngornermi paasisinnaalissaavai. Akikitsunimmi billetsersisimasut timmisartuutileqatigiiffimmut attaveqarlutik billetsinik ullormit tassanga allanngortitsissinnaalissavaat.
Tamanna Namminersorlutik Oqartussat Air Greenlandillu ataasinngornermi saqqummiunneqartumi isumaqatigiinnerisigut periarfissaalerpoq.
Ammaasoqarnissamut periusissaq:
Immikkoortoq 1: Danmarkimi tunillatsittunik misissuinermi tunillatsissimasut 5 % qaangersimanngippassuk ammananissaq aallartinneqarsinnaassaaq.
Sapaatip akunneranut timmisartumut ilaallutik tikittut amerlanerpaamik 600-sarnissaat ammaanissap kingunerissavaa.
Angalasut misissortinnermi tunillatsissimassanngillat, tikinnerullu kingornagut ullut tallimat qaangiunnerisigut misissortittassallutik. Angalasut tikereernermik kingorna tunillatsissimannginnermut misissorneqarnissartik tikillugu mattusimatinneqassapput.
Tamatuma saniatigut massakkut peqqusinerit innersuussutillu aalajangiusimaannarneqassapput.
- Ilaasartut qanoq amerlatigisut angalanissaminnik taamaatitsiinnanngikkunik kinguartitsiniartut qanoq amerlatigineri ataatsimut isigisinnnaaleriarutsigu angalarusuttunut tamanut akuerineqarsinnaasaasumik pilersaarusiussaagut, pisortaaneq, Jacob Nitter Sørensen oqarpoq.
Sapaatit akunnerannut pingasoriarluni timmisartuussisoqartassasoq
Namminersorlutik Oqartussat Air Greenlandillu akornanni isumaqatigiissut malillugu juunip ulluisa aallaqqaataannit Kangerlussuup Københavnillu akornanni sapaatit akunnerannut pingasoriarluni timmisartuussisoqartassaaq. Air Greenland sapaatit akunneranut nalinginnaasumik qulit tikillugit timmisartuussisaraluartoq, Jacob Nitter Sørensen paasissutissiivoq.
Nunatta qaqugu ammaqqinnissaanut suli ulluliisoqanngilaq. Tamanna Naalakkersuisut siulittaasuata, Kim Kielsenip tusagassiortunik sapaatit akunnerata siuliani katersortitsinermi erseqqissaatigaa.
AAMMA ATUARUK Naalakkersuisut Air Greenlandilu: Timmisartumut billetsit akikitsut utertinneqarsinnaalerput
Inatsisartuni politikerit ammaaqqinnissamut ullussaq ullumi pingasunngornermi oqallisigissavaat. Taamaammat juunip ulluisa aallaqqaataat pisortatigoortumik ammaasoqarnissaanut ullussatut aalajangerneqanngilaq – ullorli taanna Air Greenlandimi upalungaarsimasoqarnerup sivitsorneqarnerata atuutilerneranut ulluuinnarluni.
Nunattali ammaqqinnissaanut pilersaarut ersarippoq – tamannalu immikkoortunik pingasunik periusissiamik malinninnikkut ingerlanneqassalluni. Immikkoortorlu siulleq qaqugu aallartissanersoq suli aalajangerneqanngilaq. Immikkoortumili siullermi inuit sapaatit akunnerannut 600-it nunatsinnut tikittarsinnaasut aalajangersimavoq.
AAMMA ATUARUK Kielsen: Stadig ingen dato på genåbning af landet
Juunip aallaqqaataaniit aggustip naaneranut sapaatit akunnerannut pingasoriarluni timmisartuussisanissat atuisut aasaanerani angalanissamik kissaataasa naammassinissaannut naammannersut aperineqarami Jakob Nitter ima akivoq:
- Immikkoortumi siullermi unammillernartoqaratarsinnaanera soorunami qularnanngilaq, tassami tamanna sapaatit akunnerannut ilaasut 600-inut killilerneqarmata. Tamanna naatsorsuutiginngilarput, unammillernartoqassappalli tamanna oqaloqatigiissutigissavarput, Jacob Nitter Sørensen oqarpoq.
Aasaaneranut aaqqiissut
Pisortap oqarnera naapertorlugu isumaqatigiissut timmisartuutileqatigiiffiup angalanissanik allanngortitsisoqarsinnaatitsilernissaanut billetsinilluunniit killiligaasunik Takuss billetsinillu utertitsisinnaatitsinisaanut pingaaruteqarpoq.
- Isumaqatigiissuteqarnermi Namminersorlutik Oqartussat sapaatit akunnerannut pingasoriarluni timmisartuussisoqarsinnaatitsipput timmisartumilu inissat ilaannik pisillutik. Tamanna ingerlatsinermi tunngavitsinnut qulakkeerivoq, taamaalilluta killilersugaasunik niuernikkut qasukkaasinnalersilluta, pisortaq oqarpoq.
AAMMA ATUARUK Billetsit akikitsut utertitassaanngillat: Air Greenland uumitsannaq
Timmisartuutileqatigiiffiup atorfiit 75-init 100-inut atorunnaarsinnissai pilersaarusiorlugu qaammammi matumani siusinnerusumi nalunaarutigaa. Naalakkersuisunullu isumaqatigiissut tamatumunnga allannguinngitsoq, Jacob Nitter Sørensenip oqarpoq.
- Soraarsitsinissat nalunaarutigisimasagut aappaagumut ingerlatsinissamut pilersaarusiatsinnik tunngaveqarput. 2020-mi aasaq manna pisut timmisartuutileqatigiit siunissamut pilersaarusiaanut sunniuteqassanngillat, pisortaaneq oqarpoq.
