Billetsit akikitsut utertitassaanngillat: Air Greenland uumitsannaq
Coronavirus pissutigalugu timmisartut sivisuumik angalanngillat. Tamanna inuppassuarnut aasamut nunanut allanut angalasussanut eqquivoq.
Air Greenlandimi maajip 31-iata kingorna angalasussatut 'aappaluttumik' billettisisimagaanni angalanissamut ulloq allanngortinneqarsinnaanngilaq, aningaasalluunniit utertinneqarsinnaanatik.
Tamanna Mariia Simonsenip akuerisinnaanagu atsiornernik katersivoq.
AAMMA ATUARUK Nivip billetsini utertissinnaanngilaa: Ilungersunaqaaq
- Assut uumitsakkama Air Greenland taama qeratatigisumik soqutigittaatsigisumillu akimmat, Mariia Simonsen, tusagassiutilerinermi Ilimmarfimmi ilinniartitsisoq oqarpoq.
Inuit 52-it Air Greenlandimut billetsinik utertitsisinnaannginneq akerleralugu Naalakkersuisumut ammasumik allagaqaammi atsioqataapput.
- Uagut naluarput qanoq iliussalluta atuisutut, saaffissaqanngilagut allanik. Taamaattumik neriuppunga naalakkersuisup siunnersorsinnaassagaatigut imaluunniit aqqutissiuussisinnaassasoq, Mariia Simonsen oqarpoq.
Nalinginnaasumik pisinnaatitaaffeqanngilaq
- Bilettinik utertisinissamut inatsisitigut nalinginnaasumik pisinnaatitaaffeqanngilaq. Taamaatttumik utertitsisssagaanni billetsimik pisinermi atugassaasut qanoq ittuunerat apeqqutaalluinnarput, Atuisartoqarnermut Unammilleqatigiinnermullu Aqutsisoqarfik e-mailukkut taama allappoq.
Bilitsi allanngortissinnaanngitsoq nammineerlutit taamaatiinnarukku, taava bilitsinut akiliutivit aningaasartasa utertinnissaanut periarfissaqanngilatit. Tamanna oqartussat pisortatigoortumik ingerlaarfissamut angalaqqusinngippata aamma atuuppoq.
Timmisartuutileqatigiifiilli ilaasa coronamik ajornartoornermi atuisut eqqugaasut ilaasa, piffissami qaninnerpaami angalasussaagaluartut, billettiminnik utertitsinissaannut angalanisamilluunniit allannguinissaannut allisamik periarfissiisinnaanissaat periarfisaasinaavoq. Taamaammat timmisartuutileqatigiinnut iluarsiissutissarsiorlutit saaffiginnissinnaavutit.
Taamaatitsiinnaruilli akileraarutit akitsuutillu bilettimut attuumassuteqartut utertissinnaavatit. Taakkuli bilitsip akiata ilaminiinnannguarai.
Timmisartuutileeqatigiiffiit illit aningaasartuutigisinnaasatit allat, soorlu akunnittarfiit/unnuinerit biilinik atornerit il.il., akisussaaffigineq ajorpaat.
Najoqqutaq: Atuisartoqarnermut Unammilleqatigiinnermullu Aqutsisoqarfik
Inuppassuit nualluut coronavirus pissutigalugu angalanissartik nalornissutigalugulu ernummatigaat, aningaasarpassuarnillu annaasaqaratarsinnaallutik.
- Assut uumitsappunga
Naak Air Greenland inatsisinik unioqqutitsinngikkaluartoq Mariia Simonsenip timmisartortitseqatigiiffik iluarinngilaa.
- Pissutsit taamaatsillugit angalasinnaajunnaaratta aningaasat taama amerlatigisut akiliutiginikuullugit utertissinnaanngikkigut pakatsissutigigakku. Nalunngikkaluarpara billetsit aappaluttut nalinginnaasumik utertinneqarsinnaanngitsut, kisianni pissutsit nalinginnaanngimmata aamma iliuusissat nalinginnaasussaanngillat.
AAMMA ATUARUK Air Greenland atorfinnik 75-100-nik atorunnaarsitsisoq
Billetsinik utertitsisinnaanissaq allanngortitsisinnaanissarluunniit pillugit Air Greenland apersorusukkaluarparput, tamannali iluatsinngilaq. Timmisartortitseqatigiiffiup attaveqaqatigiinnermut immikkoortortoqarfianeersoq Air Greenland E-mailikkut ima allappoq:
"Timmisartuussinissamut inerteqqut maajip ulluisa 31-annit atorunnaartussaavoq, taamaattumik timmisartuussinerit timmisartorusuttussnik naatsorsuutit aallaavigalugit naapertuussagaq najoqutaralugu aaallarteqqinneqassapput. Atuisut allannguinernut eqqugaasut angalanissamut pilersaarummik nutaamik tunineqassapput imaluunniit naliginnaasumik timmisartuunneqassallutik.
Atuisut billetsisisimasut, piumasaqaatit billetsisiaminnut tunngasut piffissamilu billetsifimminni atuuttut malissavaat. Soorlu billetsit qorsuit allanngortissinnaasut allanngortinneqarsinnaassapput, billetsillu aappaluttut imaluunniit Takuss billetsit allanngortinneqarsinnaassanngillat aamma utertinneqarsinnaassanngillat.
Attaveqaqatigiinnermut naalakkersuisoq Karl Frederik Danielsen (S) KNR-imit ataasinngormalli oqaaseqartinniaraluarparput, tamannali suli iluatsinngilaq.
