Air Greenland atorfinnik 75-100-nik atorunnaarsitsisoq

Sulisut 75-iniit 100-t atorunnaarsinneqarput, Air Greenlandimi sulisitsisuminningaanniit atorfimminniit soraarsitaallutik allagarsipput.

Taakku Air Greenlandimi atorfillit tamarmiusut 20 procentingajaanik amerlassuseqarput.

Air Greenland 225 millioner koruunit tungaannut sipaaruteqassaaq.

- Sulisut annertoorsuarmik tunniusimalluarlutillu suliniuteqarsimapput aammalu ataatsimoorluta nukittuujuvugut. Kisiannili maanna atukkavut ingerlatseqatigiiffiup oqaluttuarisaanerani unammilligassat annersaraat, avataaniillu sunniutit ima annertutigilerput, allaat soraarsitsiortornerit ajoraluartumik pinngitsoorsinnaajunnaalutigit, Jacob Nitter Sørensen, Air Greenlandimi pisortaaneq oqarpoq.

Coronap ilungersunartorsiortitsilerneraniit Air Greenlandimi aningaasat kaaviiaartitat 80-85 procentimik appariartut, Jakob Nitter Sørensen sapaatip akunnerata siuliani KNR-imut oqarpoq.

Timmisartuussinerit unitsinneqartut

Timmisartukkut angallassinerit tamarmik marsip ulluisa 20-anni matuneqarput. Maanna nunatta iluani angallannerit ammaanneqaqqipput, ullumilu marlunngornermiit nunatsinniit avammut angallanneq ammaanneqarluni.

Taamaattoq ajornartoorneq Air Greenlandimut ajornartorsiortitsisorujussuuvoq. Timmisartortitseqatigiiffik arlalinnik iliuuseqarniarsarigaluarpoq: IT-kkut atortorissaarutinik taarsiineq, sillimmatinik piortorneq, siunnersortinik atuineq, pikkorissaaneq aningaasaliinerillu pisariaqavinngitsut taamaatinneqarput.

Taakku suliaqarpallaannginnermut naleqqussaaniarluni sulisunut ilaatigut akissarsiassanik uninngatitsigallarnissamut sulinngiffeqartitsigallarnisamik isumaqatigiissuteqartoqarpoq.

Aasaaneranilu saqisutut sulitinneqartartut ukioq manna immikkut atorfinitsinneqanngillat.

- Sulisut pikkorissut tunniusimasullu, ukiorpassuarni suliffeqarfik sullitallu sullillugit ulapittuarsimasut soraarsinneqartussanngornerat alianarpoq, neriuutigeqaaralu naleqqussaaneq manna niuerfiup sukkanerusumik nalinnginnaalernissaanut qulakkeeriffiusinnaassasoq, taamaalillutalu sulisut soraasitat uternissamut tikilluaqqusinnaaqqilissagivut, Jacob Nitter Sørensen – Air Greenlandimi pisortaaneq oqarpoq.