Assi: KNR

Akerleriinneq: Olsvigip pisassiissutitaqarfiunngitsumik aalisarfiit atorunnaarsinnissaat pillugu oqarnera Krusep ilumuunnginnerarpaa

Pisassiissutitaqanngitsumik aalisarfiit atorunnaarsinneqassappat naaggaluunniit? Tamanna paasiuminaappoq aamma Naalakkersuisumut.

Isumaginninnermut, ilaqutariinnut, naligiissitaanermut inatsiseqarnermullu naalakkersuisup, Sara Olsvigip pisassiissutitaqanngitsumik aalisarfiit atorunnaarsinneqassasut Qanoruumi decembarip 20-ani oqaatigaa.

AAMMA ATUARUK Pisassiissutitaqanngitsunik aalisarfiit atorunnaassapput

Tamannali Naalakkersuisuni isumaqatigiissutigineqanngilaq. Aalisarnermut piniarnermullu naalakkersuisup pisassiissutitaqanngitsumik aalisarfiit Naalakkersuisunit atorunnaarsinneqarnissaat sisamanngormat itigartitsissutigaa.

- Sara Olsvigip Inuit Ataqatigiinneersup pisassiissutitaqanngitsumik aalisarfiit atorunnaarsinneqarnissaat oqaatigaa. Tamannali ilumuunngilaq, Karl-Kristian Kruse oqarpoq.

Karl-Kristian Kruse ataatsimiinnermi decembarip 11-ani ilaanngilaq, Sara Olsvigilu naapertorlugu pisassiissutitaqanngitsumik aalisarfiit atorunnaarsinneqarnissaat tassani aalajangiissutigineqarpoq. Taamaammat ataatsimiinnermit imaqarniliaq malissagaa piumaffigaarput, tassani ilaatigut allassimavoq:

- Sinerissap qanittuani qaleralinnut atatillugu immikkoortortani pisassiissuteqarfiunngitsuni sinerissap qanittuani qaleralinniarnermi angallatit pisaat, pisassiissutinut tamarmiusunut nalunaarsuinermut ilanngunneqartassapput. Imaqarniliaq tamaat UANI atuaruk:

http://naalakkersuisut.gl/kl-GL/Naalakkersuisut/Moeder-for-Naalakkersuisut/Meeting-Records/2017/12/11_12_17

AAMMA ATUARUK IA vil have lukket kvotefrie områder

Oqaatsit allat atorlugit pisassiissutitaqanngitsumik aalisarfinni aalisarneq aalisartut pisassiissutinik atuineranut ilaavoq. Tamannalu Karl-Kristian Kruseli naapertorlugu isumaqangaarnavianngilaq.

Taanna naapertorlugu aalisakkat tamarmik pisassiissutinut ilaapput, pisassiissutilli nungukkaanni maanna iliuusereriikkatulli pisassiissuteqarfiunngitsunik aalisarfinni aalisartoqaannarsinnaavoq.

Krusep suleqatini nammineq aalisarnermut piniarnermullu naalakkersuisuuffimmini akisussaaffimminut oqaaseqarsimanera isornartorsiorpaa.

- Uani tusagassiorfitsigut imatut oqaannarneq imatut piumasaqarpugut, uku anguagut. Imaqarniliat aamma naalakkersuisut tamarmik akuerisarpaat ilumut inissamitut isikkoqarnersoq, oqallinnermi  imaqarniliami takuneqarsinnaavoq avammut oqariartuutit taama isikkoqanngitsut, Karl Kristian Kruse oqarpoq.

Sara Olsvigip matumani suliaq oqaaseqarfigeqqikkusunngilaa. KNR-ip Naalakkersuisunut ilaasortat marluk akornanni sorleq eqqortumik oqalunnersoq paasiniarlugu Naalakkersuisut siulittaasuat, Kim Kielsen pingasunngormalli oqaaseqartinniaraluarpaa. Tamannali iluatsinngilaq.

AAMMA ATUARUK Naalakkersuisut aalisarfiit killilersuiffiunngitsut atorunnaarsinniaraat

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!